Día del Llibru Asturianu

Nun Tris estrena 'La reina la guapura de Leenane' nel Teatru Xovellanos

|
Nun Tris estrena 'La reina la guapura de Leenane' nel Teatru Xovellanos

La compañía profesional de teatru asturiana Producciones Nun Tris va estrenar, el vienres 21 y el sábadu 22 d'agostu, nel Teatru Xovellanos de Xixón, el so nuevu espectáculu 'La reina la guapura de Leenane'.

Les funciones van dar empiezu a les 20.30 h. y formen parte de la programación veraniega del coliséu.

Trátase d'un testu orixinal de Martin McDonagh, reconocíu dramaturgu inglés, oriundu d'Irlanda, y ta destináu a públicu xeneral, adultu. L'autor y esta obra en concretu, un auténticu clásicu contemporaneu, pueden encuadrase dientro del movimientu In-yer-face (Nel to focicu), una impautante y perturbadora evolución del teatru realista escontra'l llamáu Teatru de la crueldá, nel que l'humor sarcástico, lo grotesco y l'acción esplícita cobren un papel bien relevante.

El títulu foi premiáu en numberoses ocasiones, y representóse n'España en versiones en castellán, euskera, catalán o gallegu. Agora preséntase en llingua asturiana, yá qiue l'aición desendólcase en Leenane, un separtáu llugar nel irlandés condáu de Galway, que ye un Gaeltacht, una reserva oficial de fala gaélica nativa. El llinguaxe de los personaxes na obra orixinal ye un inglés con espresiones gaéliques, lo que da pie a traducir la obra a un asturianu correutu, mas que bien coloquial y comprensible por cualesquier persona.

ARGUMENTU

Nun ambiente humilde y sórdidu, na Irlanda de los últimos años 80, n'una sociedá condergada a la emigración, dientro d'un contestu de violencia y crisis idiomática ya identitaria, Maureen Folan, la protagonista, caltién una complicada relación cola so madre. Ella tien 40 años y ye virxe, y la so madre, Mag Folan, ye práuticamente una inválida, anque según la so fía, desaxera los sos problemes. Una cenciella invitación para dir a una fiesta va camudar el destín de dambes. Maureen va asistir, anque la so madre va facer tolo posible pa torgalo, y ellí va realcontrase con Pato Dooley, un vieyu amigu que siempres la consideró "la reina de la guapura de Leenane". Dambos van pasar la nueche xuntos (anque nun van llegar a peracabar), y Pato fadrá-y saber que llueu va tener que volver a dise. Ray, l’hermanu de Pato, fai de mensaxeru ente ésti y Maureen, anque los mensaxes nunca lleguen a la so destinataria pola intromisión de Mag, fechu que va acarretar graves consecuencies.

LA COMPAÑÍA

Producciones Nun Tris ye una consolidada compañía d'espectáculos que lleva funcionando profesionalmente n'Asturies dende 1997, estrenando más de cincuenta espectáculos de tolos estilos y pa too tipu de públicu, atendiendo especialmente a montaxes venceyaos coles tradiciones, cultura teatro o llingua asturianes. Apocayá recibió una importante reconocencia a la so trayeutoria nel Festival FÉSTIN 2019.

FICHA TÉCNICA
Repartu:
Maureen Folan: Izar Gayo
Mag Folan: Inmaculada Rodríguez
Patu Dooley: Carlos Alba
Ray Dooley: Diego Lombardía
Direición y traducción al asturianu: Antón Caamaño
Ayte. Direición: Inma Rodríguez
Espaciu escénicu: Klara Konkoly-Thege
Cartelería: Gloria Caamaño
Espaciu sonoru, Lluz, vestuariu: Producciones Nun Tris
Xestión y Producción: PRODUCCIONES NUN TRIS

Contador Estadistiques