"Nun tien esplicación que nun se diera solución a la especialidá docente en 30 años", diz Iniciativa

Critica "la hipocresía del PSOE y el PP" al nun apoyar la PNL al respeutu de Podemos.

“Nun tien esplicación que siendo una cuestión que xeneró yá delles votaciones unánimes de la Xunta Xeneral, y tando nel programa de cásique tolos partíos, nun se diera yá solución a esti problema que lleva xenerando dificultaes dende va más de trenta años”, llamenta Iniciativa pol Asturianu. Esta organización llamentó la postura de los partíos que, sacante Foro y Asturies pela Izquierda (IX-IAS), refugaron la propuesta de la formación morada sobre la discriminación que sufre'l profesoráu d'asturianu y gallego-asturiano.

La Proposición Non de Llei (PNL), que recibió 4 votos a favor y 14 en contra na Comisión de Cultura, Política Llingüística y Turismu d'ayeri, incluyía trés puntos: “incluyir les places de les especialidaes de Llingua Asturiana y Gallego-asturiano nes plantíes orgániques y nos procesos d’estabilización llaboral”, “entamar les aiciones necesaries énte’l Gobiernu del Estáu pa que cree o facilite a l’Alministración asturiana pa crear la especialidá de Llingua Asturiana y Gallego-asturiano en condiciones d’iguales coles otres especialidaes llingüístiques” y “establecer la ufierta obligatoria de la enseñanza de Llingua Asturiana y Gallego-asturiano en tolos niveles educativos y tamién nes escueles oficiales d’idiomes”. La Federación Socialista Asturiana (FSA-PSOE) propunxo a Podemos una votación por puntos pa sofitar la segunda, argumentando que les otres dos dependíen del Ministeriu d'Educación y Formación Profesional y non del Gobiernu d'Asturies, lo que Rafael Palacios nun permitió visiblemente molestu poles acusaciones llanzaes por Mónica Ronderos na so intervención.

Dende Iniciativa pol Asturianu critiquen "la hipocresía del PSOE y del PP cola especialidá docente de Llingua Asturiana. Nun ye de recibu qu’un partíu que lleva la oficialidá de les nueses llingües, como ye’l casu del PSOE, vote en contra d’una iniciativa parllamentaria d’esti tipu y qu’otru partíu que presentó una iniciativa parllamentaria similar va años vote agora en contra". Recuerden que “ésta ye una demanda hestórica de la comunidá educativa asturiana" y que col so posicionamientu "sofitaron caltener una situación d’inxusta desigualdá llaboral".

Por último, el coleutivu aseguró que los trés puntos de la PNL "tan incluyíes dientro de la Llei d’Usu". Poro, nun ye entendible "que partíos que defenden la Llei d’Usu voten en contra d’esta iniciativa".

Na imaxe, un momentu de la Comisión de Cultura, Política Llingüística y Turismu d'ayeri.