La FSA refuga una PNL de Podemos sobre la discriminación que sufre'l profesoráu d’asturianu y reivindica la oficialidá

“Nun sé si les traen equí por demagoxa o por desconocimientu”, apuntó n’asturianu Mónica Ronderos sobre les cuestiones presentaes por Podemos nuna PNL sobre la discriminación al profesoráu de Llingua Asturiana y de Gallego-asturiano. La socialista reivindicó la voluntá política de la FSA pa cola oficialidá y Rafael Palacios respondió-y énte una acusación y el refugu a la propuesta “voten vustedes con VOX”.

Foi na Comisión de Cultura, Política Llingüística y Turismu d’esta mañana onde se trató esta Proposición Non de Llei (PNL) pa encamentar al Conseyu de Gobiernu, que contaba con trés puntos: “incluyir les places de les especialidaes de Llingua Asturiana y Gallego-asturiano nes plantíes orgániques y nos procesos d’estabilización llaboral”, “entamar les aiciones necesaries énte’l Gobiernu del Estáu pa que cree o facilite a l’Alministración asturiana pa crear la especialidá de Llingua Asturiana y Gallego-asturiano en condiciones d’iguales coles otres especialidaes llingüístiques” y “establecer la ufierta obligatoria de la enseñanza de Llingua Asturiana y Gallego-asturiano en tolos niveles educativos y tamién nes escueles oficiales d’idiomes”. La Federación Socialista Asturiana (FSA) solicitó al final de la so intervención la votación por puntos, dalgo que nun aceptó Podemos.

“El profesoráu de les nuestres llingües propies ta discrimináu pola precariedá de les sos condiciones llaborales marcaes pola interinidá, l’abusu de les medies xornaes y la imposibilidá d’alquirir la condición de funcionariáu de carrera pola falta de reconocimientu alministrativu de la so formación académica y pola minusvalorización de la so esperiencia docentes nos procesos estraordinarios d’estabilización llaboral”, denunció Palacios previamente. Ronderos apuntaría depués que “a los docentes d’asturianu y gallego-asturiano pongo-yos cara, son los mios compañeros y les mios compañeres, por eso quiciabes nun m’atrevería a aventurame trayendo equí daqué que de mano sé que nun se pue facer”, rescamplando que “nun sé si les traen equí por demagoxa o por desconocimientu” y duldando que “desconoza’l rangu de les normes que rixen esti procesu d’estabilización, que ye estatal”.

Nesi puntu, la diputada reivindicó “l’esfuerciu que dende’l Gobiernu ta faciéndose pa poder dar, nun yá sólo a los nuesos docentes d’asturianu y gallego-asturiano, sinón a les nueses llingües, l’estatus que se merecen” y recordó que “esta situación camudaría totalmente si la reforma del Estatutu d’Autonomía tuviera en marcha” yá que “tolos caminos llévennos al mesmu puntu: la oficialidá”. “La voluntá política de la FSA ye firme. Impulsemos el diálogu sobre la reforma del Estatutu, escuchemos, dialoguemos, trabayemos muncho porque tuviera asina. Hebo sicasí postures na negociación que supeditaben el derechu de tou un pueblu a tener oficiales les sos llingües a meyores fiscales pa cuatro”, acusando a Podemos de tar nesta postura mentes los socialistes taben “coles nueses llingües”.

Un comentariu que molestó muncho a Palacios, qu’a la hora de responder a la propuesta de Ronderos de votar por puntos –“el primeru y el terceru toos sabemos que son competencia del ministeriu”–, espetó-y que “nun vamos aceptala nin vamos aceptar que nos llamen demagogos. Voten vustedes con VOX”. Finalmente la PNL recibió 4 votos a favor de los 18 emitíos al contar namái col apoyu de Foro y d’Asturies pela Izquierda (IX-IAS).

Los cambios de postures y la Relixón

Adrián Pumares, de Foro, coincidió con Podemos en que “la inmensa mayoría del profesoráu de gallego-asturiano y d’asturianu ta nuna situación de discriminación con respeuto a los sos compañeros d’otres asignatures, y non con xornada completa, sinón abusando de les medies xornaes”. Recordó la defensa del PP nel 2009 al traviés del diputáu Emilio Pérez Cueva de la especialidá docente na Xunta Xeneral col refugu de la FSA nesi momentu y los cambios de postures, y calificó la so creación de “imprescindible”.

Pela so parte, la diputada d’IX, Ángela Vallina, anunció’l so votu favoratible al considerar la iniciativa “escencial pa normalizar la situación de 343 profesores d’asturianu y torgar la precarización na que s’alcuentren, al mesmu tiempu que consolidar un elementu fundamental na proteición y promoción de la nuesa llingüa, que ye un mandatu establecíu nel nuesu Estatutu d’Autonomía”. Un oxetivu qu’ensin la especialidá docente “ye mui difícil”.

Posicionáronse en contra Ciudadanos, PP y VOX. El diputáu espulsáu de la formación naranxa, Luis Armando Fernández Bartolomé, aceptó, sicasí, que “efeutivamente hai un problema na situación d’estos trabayadores de la enseñanza y ye un tema qu’hai que resolver”.

Señaló darréu que caún de los puntos de la PNL “vustedes saben que son complexos” y que “políticamente tienen que ver sobre manera con un procesu fallíu nesta llexislatura, que ye’l tema de la cooficialidá, que dende llueu allanaría absolutamente la solución a estos problemes”. Finó la so posición criticando “la política d’interinidá y del tira que llibre en xeneral col profesoráu y en particular colos profesores d’asturianu que siguió l’Alministración, nesti casu’l Partido Socialista”.

Tamién reconoció la popular María Gloria García Fernández que “ye cierto, el profesoráu d’asturianu ta nunes condiciones llaborales mui precaries, al igual qu’otros coleutivos de profesores”, señalando “al so gobiernu”, en referencia al estatal, “al que se le solicitó la especialidá y se negó”. Lo que sí ta en manes del Executivu asturianu, dixo, ye nun dexar ensin maestru de Llingua Asturiana o ensin les hores que los centros soliciten –“ye discriminar al profesor y a l’asignatura”, afirmó–, apuntanto qu’hebo dellos casos esti cursu.

“Les soluciones que vusté da son soluciones que nun paecen viables”, finó la diputada. Pela so parte, VOX faló d’imposición del asturianu nos colexos y defendió la materia de Relixón, “apartada nos temarios por motivos ideolóxicos socialcomunistes. ¿Pa esos profesores de Relixón nun hai discriminación?”.

Na semeya, Ronderos.