Niño de Elche abre'l II Ciclu de Poesía QED xunto con Lorena Álvarez y Fernández-Osorio

La Biblioteca d'Asturies acueye n'ochobre la primer de les trés sesiones d'esta iniciativa coordinada por Miguel Rodríguez Monteavaro.

Francisco Contreras Molina, conocíu pol so alcuñu artísticu Niño de Elche, ye'l primer convidáu del II Ciclu de Poesía Quod Erat Demonstrandum (QED) qu'entama l'Asociación Cultural Mezá col patrociniu económicu de la Viceconseyería de Cultura, Política Llingüística y Deporte. Na cita prevista pa les 19 hores d'esta tarde, con entrada llibre, el músicu va tar acompañada pola cantautora Lorena Álvarez, que va lleer poemes inéditos escritos en gallego-asturiano y interpretar dalgún tema, y Alejandro Fernández-Osorio, pa recitar les sos creaciones n'asturianu.

Esti ciclu de poesía nació l'añu pasáu pa promocionar y dar voz a los poetes en llingua asturiana y gallego-asturiano dientro y fuera del país, axuntando a creadores asturianos con otros de sonadía d'otros llugares. Amás del Niño de Elche, ta previsto que visite Asturies la gallega Chus Pato'l 24 de payares pa vese con Patricia Suárez y Sergio G. Camblor, y el vascu Kirmen Uribe, Premio Nacional de Narrativa nel 2009, el 22 d'avientu pa xuntase con Aníbal González y Esther Prieto.