Música, baille, artes escéniques y xuegos tradicionales, nuna iniciativa nueva en Xixón

Llámase Cultura Peatonal y busca llevar actividá cultural n'asturianu a parques y requexos de diecieséis barrios del conceyu que nun suelen acoyer esti tipu d'eventos.

En realidá ye una evolución de Música Peatonal de la Fundación Municipal de Cultura, Educación y Universidá Popular, que se celebró del 21 al 30 de xunu, pero abierta a más campos, nesta ocasión en llingua asturiana o sobre cultura asturiana, pa lo que cuenta cola collaboración de la Oficina de Normalización Llingüística de Xixón. En total son 50 actividaes que se van repartir, dende'l llunes al 7 de setiembre, ente los Xardinos de Samuel González Granda (El Polígono), el parque d’Antonio Ortega (Montevil), el Quioscu la Música de Begoña, el parque del Dr. Eguilburu Banciella (El Natahoyo), la pista polideportiva de Portuarios y la de Nuevu Roces, L’Arbeyal (La Calzada), la plaza la Ilesia d’El Poblao de Santa Bárbara, el parque Salvador Allende (Roces), el parque Tomás Zarracina, el parque Plaza de las Madres de Mayo (Laviada), el parque xunto al CP Tremañes, Los Pericones (Ciares), el parque de Montiana, el Parque Fluvial de Viesques, la plaza de les Antigües Escueles (Pescadores) y la plaza’l Mercáu de La Camocha (Vega).

L’oxetivu de Cultura Peatonal ye averar a tolos xixoneses la cultura asturiana al traviés de grupos de baille, bandes de gaites y músicos del conceyu, teatru n’asturianu pa neños y adultos, y xuegos tradicionales. Yeppah Títeres, n’El Polígono de Pumarín cola obra ‘¡Como te lo cuento!, y l’Asociación Cultural Esvilla, en Montevil con xuegos tradicionales, van abrir Cultura Peatonal el llunes a les 12.30 hores, a les que van siguir otres 48 actividaes nos diez díes de programación.