El programa Cultura Peatonal lleva la música, el baille, los xuegos y los deportes tradicionales a los barrios de Xixón

La cultura tradicional asturiana ta llegando estos díes a tola ciudadanía de Xixón gracies a la iniciativa Cultura Peatonal. Dende’l llunes y hasta’l 8 de setiembre prográmense actividaes de música, bailles, xuegos y deportes tradicionales en parques y requexos de barrios y parroquies del conceyu, llugares non avezaos a acoyer esti tipu d’actividaes.

Cimavilla (Plaza Xovellanos), Montiana, Ciares-El Llano (Los Pericones), La Calzada (L’Arbeyal), El Poblao de Santa Bárbara, El Polígono (plaza de Clara Ferrer), La Camocha, Tremañes, Nuevo Gijón/La Peral (parque d’Avelino Vidal), Roces (parque de Salvador Allande), El Natahoyo (parque del Dr. Eguiburu Banciella), Laviada (parque de les Madres de Plaza de Mayo), Pescadores, Xove, Portuarios, Montevil (parque d’Antonia Ortega), Nuevo Roces, Serín (plaza de la ilesia de San Miguel y prau de la romería) y El Muselín, amás de Begoña y el parque de Tomás Zarracina nel centru, son los llugares onde va desendolcase Cultura Peatonal. Parques y requexos onde poder disfrutar estos díes de bandes de gaites, grupos folclóricos y xuegos y deportes tradicionales.

Nesta edición, que da continuidá a la celebrada l’añu pasáu, participen l’Asociación Cultural Esvilla, l’Agrupación Folklórica Asturiana Los Xustos, el Grupu Folklórico El Xolgoriu, la Banda Gaites Villa de Xixón, la Banda Gaites Infantil Magüeta, la Banda de Gaitas Seronda, el Grupo Folklórico El Turruxón, la Banda de Gaites Conceyu de Xixón, Coros y Danzas del Real Grupo de Cultura Covadonga, l’Asociación Coros y Danzas Jovellanos, la Banda de Gaites Noega, l’Asociación de Intérpretes de la Canción Asturiana (AICA), la Banda de Gaites Garulla, el Grupo Folklórico Excelsior, la Banda de Gaitas Pepe Blanco y el Grupo Folklórico Trebeyu. Les actividaes prográmanse pa les 12.30 o les 20 hores, y son toes de baldre.

Güei toles actuaciones van desendolcase de tarde, cola presencia de Seronda n'El Poblao de Santa Bárbara, El Xolgoriu n'El Polígono, Villa de Xixón en La Camocha, El Turruxón en Tremañes y Conceyu de Xixón en Nuevo Gijón/La Peral. Mañana va ser el turnu, tamién n'horariu de tarde, d'El Grupo en Begoña, Jovellanos en Roces, Magüeta n'El Natahoyo, Noega en Zarracina, El Xolgoriu en Laviada, Seronda en Pescadores y AICA en Xove.

Na imaxe, actuación de la Banda Gaites Villa de Xixón ayeri pela tarde en La Calzada. Semeya propiedá de la Banda Gaites Villa de Xixón.