Misiva despídese del públicu en casa

Esti vienres va tener llugar en Grau, nel marcu de les fiestes de la Segunda Flor, el conciertu de despidida de Misiva. La banda moscona pon asina’l ramu a 15 años de punk-rock n'asturianu en casa arrodiaos de collacios y siguidores desplazaos de dientro y fuera del país.

Esti vienres va tener llugar en Grau, nel marcu de les fiestes de la Segunda Flor, el conciertu de despidida de Misiva. La banda moscona pon asina’l ramu a 15 años de punk-rock en casa arrodiaos de collacios y siguidores desplazaos de dientro y fuera del país.

Foi nel 2009 cuando arrancó esti proyeutu qu’entamó asoleyendo discos billingües colos cantares doblaos, en castellanu y asturianu. Nun tardaríen n’apostar dafechu pola llingua del llar, única nos sos trabayos últimos, que llevaríen más allá de les nueses llendes.

Conciertos en diferentes sales de tol Estáu o nel Resurrection Fest permitieron a Misiva garrar un nome n’escena. Un viaxe que fina agora, con función final en casa, en Grau.

Va ser mañana, a les 22 hores, n’El Frontón, cita na que va haber sorpreses emotives, anuncien dende la banda. Enantes, Tribute Against the Machine, banda asturiana tributu a RATM que ta dando muncho que falar pol so soníu, va calecer una despidida que promete ser una fiesta.

Hasta siempre, Misiva.

Na semeya, actuación de Misiva nel XLIII Día de les Lletres Asturianes, nel Teatru Campoamor añu 2022.