Misiva comunica "la última misiva" del grupu

Los de Grau despídense nun mensaxe en redes "cola dignidá que merez la banda y tolo que representó pa nós y pa la música n’asturianu".

"Sabemos que munch@s nun vais entendelo y qu’igual va ser difícil d’aceutar, pero depués de tantu tiempu, depués de tantes batalles xuntos, tantos conciertos, tantes ilusiones y tantos momentos que van quedar pa siempre na nuesa memoria, creemos que ye’l momentu de poner puntu y final a Misiva", apuntaba'l grupu de punk rock y hardcore melódicu na so cuenta de Facebook. Un adiós que presenta en trés mensaxes baxo'l títulu de 'La última misiva', de la que fixo pública de momentu la primer parte, cola intención d'asoleyar les otres dos a lo llargo de la selmana.

"Nun hai más motivos qu’el sentir que ye la hora de zarrar una etapa, de pesllar un ciclu y d’entamar otru nuevu tanto na música como na vida. Nun se pueden facer especulaciones porque los 4 que formamos esto querémonos y vamos seguir siendo collacios d’equí palantre cola mesma hermandá de siempre. Simplemente queremos pone-y’l ramu a esta parte de la nuesa vida tan importante y vamos facer que la despidida de Misiva seya dalgo que nin nosotros nin vosotres podáis escaecer. Queremos facelo cola dignidá que merez la banda y tolo que representó pa nós y pa la música n’asturianu", espresa la banda.

Por últimu, apunta que "tovía nos queden munches coses que dicir, munches coses qu’agradecer y, sobre too, les feches d’esta despidida que va ser tan difícil como emotiva".