Mieres sigue celebrando les nueses lletres con un conciertu nel Recintu Ferial de Santuyano

|
Cartelu Conciertu Selmana de les Lletres Asturianes en Mieres

Va ponelu la Banda Sinfónica del Ateneo Musical de Mieres y va emitise en direuto.

La XLII Selmana de les Lletres Asturianes en Mieres allárgase tol mes. Son delles les actividaes programaes que se sumen a la esposición sobre la vida y obra de Nel Amaro instalada nel estragal del Auditoriu Teodoro Cuesta, onde va permanecer hasta'l 11 de xunu.

El sábadu va tener llugar la primera, entitulada 'Conciertu Selmana de les Lletres Asturianes", con entamu previstu pa les 19 hores nel auditoriu del Recintu Ferial de Santuyano. La Banda Sinfónica del Ateneo Musical de Mieres va interpretar baxo la direición d'Antonio Cánovas "un repertoriu esclusivu de música inspirada nes nueses tradiciones, vezos, lliteratura, paisaxes y ciudaes", adelanten.

El platu fuerte va ser la estrena de la 'Suite Asturiana' de la compositora manchega, con residencia n'Asturies, Carmen Loriente, y basada nel 'Cancionero Musical de la Lírica Popular Asturiana' d'Eduardo Martínez Torner. El conciertu ye de baldre, pero hai que retirar invitaciones nel Recintu Ferial o acutales nel teléfonu 985.45.19.53, cola posibilidá de siguilu en direuto pela cuenta de Facebook de la banda.

Contador Estadistiques