Más de 80 espertos roblen un manifiestu solicitando la revisión del proyeutu del Chao Samartín

Especialistes en materia de Conservación y Restauración del Patrimoniu Cultural, Arqueoloxía, Epigrafía, Paleografía y Historia del Arte roblaron un manifiestu solicitando la paralización preventible del Proyeutu de Consolidación del Xacimientu Arqueolóxicu del Chao Samartín. Piden a les alministraciones que se revise atendiendo les recomendaciones de los informes d’ICOMOS.

L’Asociación Profesional d'Arqueólogos, Conservadores y Museólogos d'Asturies (APACMA) promovieron esta recoyida de firmes a la que se sumaron una ventena de caderalgos universitarios, más de venti profesores d’universidaes europeas y norteamericanes, investigadores de centros españoles, franceses y portugueses, direutores de museos arqueolóxicos y direutores de proyeutos d’intervención sobre’l patrimoniu cultural, amás de los arqueólogos titulares de les escavaciones y autores del centenar llargo de trabajos espublizaos sobre’l Chao Samartín que dieron a conocer la riqueza estraordinaria d’esti xacimientu asitiáu en Grandas de Salime, como Ángel Villa, direutor científicu d’escavaciones arqueolóxiques del castru ente 1995 y 2014. En total, son nás de 80 espertos na investigación, conservación y musealización de xacimientos castreños que se dirixen d’esti mou tanto al Gobiernu d’Asturies como a los ministerios de Cultura y Deporte, y de Tresportes, Movilidá y Axenda Urbana.

El so pidimientu ye la paralización preventible del Proyeutu de Consolidación del Xacimientu Arqueolóxicu del Chao Samartín previstu, que cuenta con financiación del 1 por cientu cultural, “pa qu’atienda les recomendaciones espresaes por ICOMOS España, ICOMOS Comité Internacional d’Itinerarios Históricos (dambos organismos asociaos a la UNESCO) y asociaciones profesionales de l’Arqueoloxía y la Conservación del Patrimoniu Cultural”, esplica APACMA nuna nota. “Los abaxo firmantes conocemos los valores que faen del castru Chao Samartín un llugar de relevancia estraordinaria pal conocimientu de llargos periodos de la Prehistoria Reciente y más temprana Antigüedá nel Noroeste de la Península Ibérica y sabemos de les graves consecuencies que podría suponer pa la conservación d’esos valores la execución del proyeutu refundíu d’obres de consolidación nel castru de Chao Samartín”, principia’l manifiestu.

Nel testu tamién piden que se tenga en cuenta’l dictame d’ICOMOS (Conseyu Internacional de Monumentos y Sitios), que recomienda “con empeñu la restitución total de la propuesta presentada, atendiendo a los criterios afayadizos de conservación referíos pola normativa nacional y internacional”, asina como “el concursu de profesionales de la Conservación Arqueolóxica y arqueólogos conocedores de tolos condicionantes científicos del sitiu”. De lo contrario, consideren que provocará “l’ocultamientu, destrucción o falsificación d’elementos claves na interpretación del xacimientu, de la so historia y, poro, tamién de la historia d’Asturies”, añade APACMA, qu'alerta de daños irreparables pal castru.