APACMA súmase a les crítiques al proyeutu de consolidación del castru del Chao Samartín, que califiquen de “atentáu”

|
Chao Samartín

L’Asociación Profesional d'Arqueólogos, Conservadores y Museólogos d'Asturies (APACMA) considera “insostenible dende delles persepeutives” el proyeutu de consolidación del castru Chao Samartín, y la so execución “un atentáu”. El Gobiernu diz tar dispuestu a revisalu, pero non a arrenunciar a la financiación estatal yá aprobada al traviés del 1 por cientu cultural del ministeriu.

El Proyeutu de Consolidación del Xacimientu Arqueolóxicu del Chao Samartín, impulsáu pol Conceyu de Grandas de Salime col sofitu del Gobiernu, vien recibiendo numberoses crítiques y inclusive provocó’l refugu de tola oposición na Xunta Xeneral na llexislatura anterior. La selmana pasada l’Asociación de Restauradores y Conservadores de España (ACRE) unvió cartes a la Conseyería d’Eduación y Cultural y los ministerios de Fomentu y Educación, Cultura y Deporte refugando tamién dichu proyeutu pal castru, asina como que pueda acceder al 1 por cientu cultural, asegurando que taríen dispuestos a llevar l’asuntu a los tribunales pa frenar lo que consideren un ataque al patrimoniu.

Agora ye APACMA la que presenta la so esmolición al respeuto. “A partir del analís de la documentación a la que tuvimos accesu tamos en disposición d'afirmar ensin xéneru de duldes que'l proyeutu resulta insostenible dende delles perspeutives y la so execución nos términos previstos un atentáu qu'en nenguna manera pueden consentir les Alministraciones Públiques”, afirma esti coleutivu.

No que respeuta al aspeutu arqueolóxicu asegura que “denota un desconocimientu fondu ya inxustificáu de los pormenores de la historia del xacimientu sobre'l que pretende intervenise que deriva nuna propuesta que furtia la dimensión diacrónica na exhibición de los restos, por culpa de que fases enteres de la so ocupación van ser borraes”. Mentes, dende’l puntu de vista de la restauración “lo más llamativo, anque non l'únicu erru de bultu, ye'l completu despreciu por dalgunos de los principios fundamentales de los encamientos internacionales en caltenimientu y restauración del patrimoniu, casu del de reversibilidá o'l de mínima intervención”.

Amás deteuta “una evidente desatención a criteriu museolóxicu dalgunu y manifiestes irregularidaes na tramitación alministrativa del espediente”, apuntando que “tantos y tan grandes defeutos” namái se pue esplicar pol la falta “de profesionales de l'arqueoloxía, el caltenimientu o la museoloxía”, un concursu que ye “ imprescindible nun proyeutu d'esta índole”. Poro, APACMA reclama “la dignificación de les disciplines de los nuesos asociaos” y quier manifestar “el radical desalcuerdu con un proyuctu qu'entendemos viciáu dende la so concepción y con severos riesgos de xenerar daños irreparables nun Bien d’Intereés Cultural (BIC)”, lo que-y lleva a solicitar al Conceyu de Grandas de Salime, a la conseyería y al Ministeriu d’Educación, Cultura y Deporte “que retiren los compromisos de financiamientu y exerzan les sos respeutives competencies, torgando la execución de tal desatín”.

Reaición del Gobiernu

Genaro Alonso, conseyeru d’Educación y Cultura en funciones, tres estes reaiciones últimes aseguró que “naide nun quier facer dañu a un xacimientu d’esa categoría y relevancia. Lo que queremos ye facelo bien, y si hai que revisar dalgunos aspeutos pa una meyor actuación sobre’l Chao nadie tará a la escontra d’ello, y menos yo, pero d’ehí a prescindir o arrenunciar al apoyu del ministeriu que yá ta concedíu hai un cachu”.

Contador Estadistiques