Asturies repite trunfu nel MacCrimmon, nesta ocasión de la mano del sierense Álvaro Álvarez

|

Per segundu añu consecutivu, el Troféu MacCrimmon de gaita solista asturiana y gallega viaxó p’Asturies. El sierense Álvaro Álvarez superó a los otros siete músicos participantes y releva nel palmarés a Jesús Fernández.

El Palais des Congrès d’An Oriant acoyó na tarde del sábadu una edición nueva d’esti gallardón creáu nel 1986 nel ámbitu del Festival Interceltique de Lorient qu’enfrenta a les meyores promeses de los nomaos ‘países celtes del sur’. Nesta ocasión Fernández nun pudo repetir premiu, pero la victoria quedó en casa tres la gran actuación d’Álvarez, que convenció al xuráu coles sos interpretaciones. Ésti ta formáu por espertos bretones, gallegos y asturianos, que tienen que valorar el bon facer de los gaiteros con pieces de los trés países.

D’esta manera, la delegación asturiana vive’l so primer gran ésitu nesta edición del Interceltique, la númberu 44, que ta dedicada nesta ocasión a Éire. Na xornada de güei ta prevista l’actuación de l’Asturiana Mining Company a les 21.30 hores nel Palais des Congrès xunto colos gallegos Cuarteto Caramuxo y los escoceses Maggie MacIness y Tony Mc Manus. Mentes, nel Espace Marine, escenariu principal del certame, va tener llugar la Gran Nueche d’Éire, cola actuación de Lúnasa en compañía de la orquesta del festival.

Contador Estadistiques