Día del Llibru Asturianu

Álvarez Fernández repite n'An Oriant como ganador del MacCrimmon

|

El gaiteru Álvaro Álvarez Fernández llevó’l trunfu nel prestixosu troféu qu’entama’l Festival Interceltique de Lorient. Asturies suma asina trés victores consecutives nesti concursu nel que participen músicos asturianos y gallegos.

D’esta forma, el sierense convirtióse’l sábadu nel primeru en ganar en dos años siguíos el Trophée Mac Crimmon pour Solistes de Gaita, concursu con 30 años de vida qu’enfrenta a participantes de les nomaes ‘naciones celtes del sur’, esto ye, Asturies y Galicia. Ésti consiste na interpretación de pieces asturianes, gallegues y bretones énte’l públicu y un xuráu conformáu por especialistes de los trés paíes, que nesta ocasión tuvo a Xuacu Amieva y Andrea Joglar como representantes de la nuesa delegación.

Álvarez Fernández superó na puntuación a los otros trés participantes asturianos, Daniel Meré, Fabián Fernández Fernández y Fernando Vázquez, y a los gallegos Xabier Pereira, Javier Vázquez, Xesús Rodríguez y Marcos Tella. El sierense, poro, repite premiu y aumenta’l dominiu d’Asturies nel concursu, con trés victores nos trés últimos años, yá qu’hai que sumar la de Jesús Fernández nel 2013.

Ésitu na nueche máxica y nel desfile

La participación asturiana estos primeros díes n’An Oriant ta siento bien destacada. Al ésitu nel MacCrimmon hai que destacar les intervenciones de Banda Gaitas El Trasno (Cuaña), la Banda Gaites LaKadarma (Nava) y l’Asociación de Baile y Danza Tradicional Filandón (Uviéu) na primer de les Nuit Interceltique Bretagne nel campu fútbol del Lorient, celebrada’l sábadu, y na Gran Parade des Nations Celtes del domingu, actividá que tornó a sacar a miles de persones a les cais de la villa.

El chigre asturianu, con sidra y productos del país y música en direuto, tornó a ser un añu más el más animáu de la Quai des Pays Celtes esta fin de selmana, sobre manera na nueche del sábadu, cuando vivió un enllenu absolutu.

Actuaciones asturianes nel restu del festival

A les 17.10 hores va tener llugar la proyeición del llargumetraxe en llingua asturiana ‘Bernabé’ nel Auditorium du Cercle St Louis, a lo que va siguir un alcuentru col so direutor, Pablo Casanueva. Mentes, a les 18 hores, va principiar na Quai de la Bretagne la primer sesión del Trophée de Musique Celtique Loïc Raison, enfocáu a grupos mozos, nel qu’Asturies va tar representada por Alienda. Esti certame va allargase hasta’l vienres, siempre a la mesma hora y nel mesmu llugar, siendo la final el sábadu.

El Trasno va participar mañana, a les 14.30 hores nel espectacular Espace Marine, nuna actuación xunto cola formación irlandesa Derryclavin Pipe Band y la escocesa Isle of Cumbrae Pipe Band. Yá de nueche, a les 21.30 hores nel Palais des Congrès, Xuacu Amieva y José Manuel Tejedor van ser los representanes asturianos de la gran nueche de la gaita xunto colos gaiteros Alberto Coya y Edelmiro Fernández (Galicia), Fred Morrison (Alba) y Patrick Molard (Breizh).

El miércoles, tamién a les 14.30 hores nel Espace Marine, va ser el turnu de LaKadarma, que va compartir escenariu cola Bagad de Lann Bihoué bretona y cola New Ross Pipe Band irlandesa. Mentes, el xueves, va actuar Cerezal a les 15 hores nel Palais des Congrès xunto coles irlandeses The Friel Sisters.

El día caberu con participación asturiana nel XLV Festival Interceltique de Lorient va ser el vienres, xornada que Javier Tejedor va abrir a les 10 hores nel Palais des Congrès con una clase maxistral d’acordión xunto cola irlandesa Sharon Shannon. Dambos van protagonizar un conciertu a les 21.30 hores nel mesmu llugar. Mentes, los bailles de Filandón van animar la sesión del Espace Marine de les 14.30 hores, na que tamién participen los escoceses Keltika Highland Dancers, los córnicos Keskowethyans, los maneses Ny Fennee, los irlandeses Planxty O Rourke y los gallegos Trebede. Por último, Cerezal va actuar a les 22 hores na Quai de la Bretagne xunto con Kendirvi Orchestra y Silabenn Trio.

Otra manera, a toes estes actuaciones musicales y la proyeición de ‘Bernabé’ hai que sumar la participación de l’artista Helena Toraño, Premio Asturies Moza d'Artes Plástiques, na esposición Euro Celtic Art cola so obra ‘Las cosas’. Ésta va tener como sede l’Hôtel Gabriel mientres los díes festival, esti añu dedicáu a Mannin y Kernow.

Na semeya, Álvarez Fernández toca una pieza mientres l’actu d’entrega de premios.

Contador Estadistiques