L'Unión Financiera dexó la Copa Princesa n'Uviéu

El baloncestu asturianu consigue la primer Copa de categoría LEB tres el trunfu uviedín sobre'l San Pablo por 80-77. El Gijón Baloncesto fora finalista na temporada 96-97.

Nun foi un partíu fácil pal Unión Financiera Baloncesto Oviedo, que vio cómo nel últimu cuartu'l San Pablo Inmobiliaria Burgos se ponía per delantre nel marcador (66-67) tres dominar los de Carlos Marcos na primer parte. Asina, al descansu llegábase 42-33, resultáu que los burgaleses comenzaríen a recortar poco a poco tres la reanudación.

Nos minutos decisivos, Pumarín apretó y l'Unión Financiera supo caltener una pequeña ventaya que'l San Pablo, con malos ataques nos momentos decisivos, nun pudo contrarrestar. Al final, victoria llocal por 80-77 y alegría n'Uviéu pol títulu más importante algamáu pol baloncestu asturianu hasta la fecha.

Enantes, hai agora venti años, el Gijón Baloncesto algamaría la final de la primer edición de la Copa Príncipe, dende l'añu pasáu Princesa, que se xugó con formatu de final a 4 en Torrelavega. Tres superar a Huelva en semifinales por 70-63, los xixoneses nun pudieron col equipu llocal, que ganó por un axustáu 71-68 nun gran partíu de Bob Harstad, l'aleru estauxunidense que debutara n'Europa nes files del Gijón y onde protagonizara dos grandes temporaes na desapaecida Primera División, equivalente a l'actual LEB, enantes de fichar pol Estudiantes.

Semeya propiedá del Oviedo Club Baloncesto.