L'Unión Financiera busca col 'efeutu Pumarín' llevar la Copa Princesa

Los de Carles Marco enfréntense a partíu únicu en casa, onde los uviedinos se faen fuertes, al San Pablo Inmobiliaria Burgos.

El polideportivu de Pumarín va a tornar a quedar pequeñu pa la final de la Copa Princesa (18 hores, GOL) énte l'Unión Financiera Baloncesto Oviedo y el conxuntu burgalés fundáu la temporada pasada, que va contar con 170 siguidores na grada. Dambos equipos participen per primer vegada na final d'esta competición, que nel 2016 estrenó denominación.

L'Unión Financiera derrotó hai dos selmanes al San Pablo nel partíu de la segunda vuelta de la LEB por venti puntos de ventaya (86-66), victoria que va tratar de repetir mañana nel so feudu, onde los de Marco son un rival terrible. Sicasí, los uviedinos tienen pa esti partíu la baxa importante del base Dani Pérez, mancáu precisamente nesi alcuentru, dalgo qu'esperen contrarrestar col puxu de la so afición.

Pela so parte, los burgaleses tán pendientes de si podrán contar pa mañana cola presencia de Filip Toncinic, que torna a Burgos pa cubrir la baxa del xugador cortáu por San Pablo Percy Gibson. El téunicu Diego Epifanio 'Epi' ta a la espera de la llegada del transfer del croata.