Luis Núñez y Susana Sela preparen la estrena de ‘Intermitentes’, “un espectáculu pa divertir y entretener”

Poesía, música y teatru axunten en ‘Intermitentes’, propuesta de Luis Núñez y Susana Sela que se preestrenó nel POEX y que tien confirmaes cuatro feches en Xixón, la primera’l miércoles viniente n’El Llano. “Ye un espectáculu pa divertir y entrener”, apunta’l músicu llueu d'asoleyar el videoclip de ‘Celos’, pieza billingüe d'un proyeutu qu'inclúi CD.

Llueu d’asoleyar l’añu pasáu’l discu ‘Viaxar con poco pesu’ y d’un llustru poniendo coses en común, Núñez y Sela siguen creando xuntos. “Esti trabayu yera poesía mui seria. El ser humanu tien munches intermitencies y con esa premisa pidi-y que creara sobre distintos temes sociales, más populares, como lo vegano, el Tinder, los celos…, pa pone-y música”, esplica’l tamién cabezaleru de Los Folganzanes sobre l’orixe de ‘Intermitentes’.

El resultáu foi una decena de pieces que van formar parte d’un discu billingüe, con espaciu pal asturianu nos poemes de Sela, de diferentes estilos musicales. Y con ellos, “un espectáculu pa divertir y entretener”: “Queríamos facer dalgo que tenga calidá, culturalmente ricu y qu’entretenga, dalgo complicao anguaño con tola ufierta qu’hai en tantes plataformes”, analiza.

En marzu, nel marcu del POEX, fíxose’l preestrenu, una puesta n’escena de 45 minutos “que gustó muncho” y llevó a una contratación pa cuatro feches nueves en centros municipales de Xixón. Pa esta aventura los artistes ampliaron la propuesta a una hora colos cantares de ‘Intermitentes’ “y 5 o 6 nuevos” nos que la voz de Sela y la de Núñez, tamién a la guitarra, acompáñense del guitarrista Willy Big Brown.

La primera va ser el miércoles viniente a les 19 hores nel Centru Municipal Integráu d’El Llano, con entrada llibre. Llueu l’espectáculu va aportar, en fecha por confirmar, a El Coto, L’Arena y l’Atenéu de La Calzada.

Cuatro vídeos asoleyaos

“Cuando faigo un cantar visualízolo con un videu”, rescampla Núñez, consciente del cambiu na sociedá a la hora de consumir música. Xunto con Sela yá lleva unos cuantos asoleyaos, cuatro d’ellos de ‘Intermitentes’: ‘Intermitentes’, ‘Día mundial’, ‘Rebajas de invierno’ y ‘Celos’, l'últimu n'estrenar, nel que la poeta recita n'asturianu.

Magar que “la situación nun ye bona; ta mui difícil pa la cultura y la música”, Núñez afrontar esti proyeutu con Sela “muncha ilusión”. “Ye daqué que nos presta, con cantares propios, cuando lo más fácil sería facer versiones, como ye vezu agora”, apunta’l músicu, que promete al públicu “dalgo distinto y prestoso”.