Luis Núñez y Los Folganzanes asoleya ‘Blinca’, “el discu más pop de los trés"

|
Luis Núñez y Los Folganzanes

‘Tengo un sitiu pa ti’ ye’l tema que diba defender Luis Núñez y Los Folganzanes esta fin de selmana n’Apenrade, población danesa de fala alemana, nel XIII Liet International. Ésti forma parte de ‘Blinca’, “el discu más pop de los trés”, que la banda ta acabante d’asoleyar.

‘El cantar de folganzán’ (2013) y ‘Xuro nun tornar’ (2016), editaos pola Factoría Cultura d’Avilés, foron los dos primeros de la banda liderada por Núñez, a la qu’agora se suma ‘Blinca’, “que toma’l so nome del primer cantar del álmbum, dedicáu a la foguera de San Xuan”. Xunto a ella otros nueves temes “que falen del amor, de viaxes…, que cuenten histories”, añade’l cantante, músicu y compositor que pasara por grupos como Sombrero de Copa o Fuera de Serie.

‘Echa un culín’, ‘El filu que nos une’ o ‘Un home feliz’ son los nomes de dalgunos de los mesmos, ente los que s’inclúi ‘Tengo un sitiu pa ti’, que fala d’un gatu que va quedar ensin casa, un corte que-y prestó a la organización del Liet Internacional, festival nel qu’Asturies ta ausente dende la décima edición, nel 2014, cuando la Banda Gaitas El Trasno defendió, por cuenta propia, el cantar en gallego-asturiano 'Volviche' na población baxa-saxona d'Oldenburg. “Díbemos viaxar ayeri vía Madrid hasta Hamburgu y llueu per tren o carretera hasta Dinamarca, pero tuvieron que suspender el festival y agora tamos a ver si recuperamos les perres de los aviones”, rellata Núñez.

Depués de conocer el certame européu de cantares en llingües minorizaes depués de la edición celebrada en Xixón nel 2012, precisamente la última na qu’Asturies participó de manera oficial como parte del Premiu al Meyor Cantar –la del 2013 en Còrsica a la que diba a acudir Taranus con ‘Ensin ti’ suspendióse por decisión de la sede ensin dexar tiempu a la organización del Liet a buscar una nueva–, el cantante tornó a atopase col festival por mediación de la manager de la banda, Patricia Moro. “Propunxo unviar una maqueta con cantares pa la edición última y nun nos llamaron, pero esta vegada sí”, esplica.

Una bona manera de dar a conocer ‘Blinca’, “el discu más pop de los trés que tenemos”, nun sólo n’Asturies, sinón en toda Europa nuna cita con representantes de venti territorios con llingua propia, ente ellos Galicia y Catalunya, que finalmente frenó la pandemia de COVID-19. “Ta falándose de cambiar les feches o facelo l’añu próximu. Nesi casu oxalá que caltengan los grupos, porque yera una actuación que nos facía muncha ilusión”, reconoz Núñez.

La paralización que somete al planeta’l coronavirsu tamién frenó la presentación del discu nel país, con un conciertu previstu nel xixonés Savoy. Autoeditáu col sellu propiu Gatu en La y grabáu nel so estudiu d’El Cerilleru, “sólo pudimos facer un conciertu de presentación nel Manglar, n’Uviéu”, onde se punxeron a la venta 100 copies del CD al nun poder disponer del total de copies encargaes a una firma catalana.

Ésti nun ye l’únicu formatu nel que se va presentar ‘Blinca’, “yá que tamién apostamos por un USB que tien forma de tarxeta de creitu, nel qu’incluimos dellos conteníos estra”, como semeyes o videoclips. Ésti va vendese a 12 euros, por 10 del CD, cola posibilidá tamién d’acceder al álbum en plataformes dixitales.

Formación de 4 o 7 integrantes

Nunos tiempos complicaos pal direuto –“nun esiste un circuitu nin hai sitios pa tocar”, apunta’l cantante, que tamién cita la ‘moda’ de les versiones en llugar d’apostar polos artistes con composiciones propies–, el grupu amuesa flexibilidá con una formación base de cuatro músicos y otra de siete, más folk, pa escenarios más grandes. Fredo Trelles (batería), Marcos Díaz (baxu) y Willie BigBrown (guitarra) formen anguaño Los Folganzanes, a los que se suma Dani García de la Cuesta (violín), Fabián Fernández (gaita y flauta) y Armando Fernández (teclaos).

Rubén Alba o Diego Infiesta son otros de los músicos que pasaron per una banda que nel 2017 llevó’l X Premiu al Meyor Cantae con 'La ñeve y la esmeralda', certame nel que s’escoyía’l tema más destacáu n’asturianu o gallego-asturiano del 2016. “Ehí tocamos techu. Permitiónos salir en prensa y danos a conocer un poco más”, llegando tamién la llamada del Festival Interceltique de Lorient pa participar na edición del 2018.

Agora, esperando que pase la situación actual, complicada pa munchos musicos énte la falta d’actuaciones, Lúis Núñez y los sos folganzanes nagüen por tornar a xubir a un escenariu pa llevar los temes de ‘Blinca’ al direuto. De momento, los sos siguidores van poder tener un pequeñu adelantu’l vienres a les 19 hores dientro del #FormientuEnCasaFest, cita na que’l cantante, acompañáu de la so guitarra, va tocar dos o trés cantares del discu nuna sesión onde va haber tiempu pa histories y dalguna versión especial que’l xixonés ta preparando con ciñu estos díes.

Contador Estadistiques