Los XI Alcuentros de Músiques Asturianes programen en Xixón “una representación de les músiques del país”

Trés actuaciones esta selmana y una cuarta’l día 21 conformen los XI Alcuentros de Músiques Asturianes qu’entama la Fundación Municipal de Cultura, Educación y Universidá Popular en collaboración col Taller de Músicos. Esta edición programa “una representación de les músiques del país”, presentando artistes de cuatro estilos diferentes.

El pop, el hip hop, el jazz y el folk van sonar en dellos espacios, “allugamientos estratéxicos de la cadarma artístico-cultural de la ciudá, qu’arreyen dende’l patrimoniu industrial al espaciu cultural y urbanu”, depués de que l’últimu ciclu d'esta iniciativa liderada pola Oficina de Normalización Llingüística de Xixón tuviera dedicáu a la electrónica. Cuatro propuestes con presencia, como nun podía ser d'otra forma, de la llingua asturiana.

Va abrir los conciertos de los XI Alcuentros de Músiques Asturianes, toos ellos de baldre, mañana a les 19.30 hores na Ciudadela Celestino Solar la cantante Silvia Quesada, que va repasar dellos cantares de los sos discos en solitariu nun formatu de tríu preparáu dafechu pa la ocasión. La de Tinéu va tar acompañada por Alfredo González a los teclaos y por Silvia Gestido a la viola.

El miércoles, nel mesmu llugar y a la mesma hora, el turnu va ser pa Mostru l’Horru en compañía del DJ Jotadejota. El grupu de rap en llingua asturiana formáu por Fran Méndez y Yannick Gutiérrez asoleyó l’añu pasáu’l trabayu ‘Señales de fumu’.

Completa esta primer selmana del ciclu Slum Suit el xueves a les 19.30 hores nel patiu de Centru Cultural Antiguu Institutu. La banda multicultural que dio los sos primeros pasos en New York liderada pol gaiteru y saxofonista Carlos Casado avanzó nestos años hacia’l jazz, bebiendo del cancioneru popular asturianu, trabayando anguaño nun formatu de cuartetu cola participación de Xaime Arias al pianu, Óscar Santos al baxu y Eva D. Toca a la batería.

Día Européu de la Música

L’actuación que pon el ramu a los XI Alcuentros de Músiques Asturianes retrásase al miércoles 21 pa facela coincidir col Día Européu de la Música. A les 19.30 hores na cai Tomás y Valiente –nel casu de mal tiempu, pasaría al Antiguu Institutu– el tríu asturandaluz de folk Deira formáu pol xixonés Gonzalo Llao al bouzouki y Juan Almaraz a la flauta irlandesa y Salvador Daza al violín, banda que ta garrando nome en tol arcu atlánticu, sobre manera n’Escocia, va tocar temes del so primer discu, que lleva’l nome llocal d’esti país, ‘Alba’, nun xuegu col significáu tamién de la pallabra n'asturianu.

Na semeya, d'izquierda a derecha, Quesada, Mostru l'Horru, Slum Suit y Deira.