Los X Alcuentros de Músiques Asturianes miren pa la electrónica

|
Eduardo G. Salueña, Miguel Barrero, María Xosé Rodríguez López y Fernando Yagües presentación X Alcu

Del 22 al 25 de payares van celebrase en Xixón los X Alcuentros de Músiques Asturianes, qu’estrenen sede: el Muséu del Ferrocarril. Esta edición lleva la etiqueta ElectronicAst! y va contar con sesiones con Fruela 757, Tasio, Bimenes Underprau y Llevólu’l Sumiciu, amás de la participación de Tever con trés vídeos creaos a costafecha pa esti ciclu.

La electrónica, poro, va ser protagonista “tanto nel llinguaxe sonoru de les propuestes que tán na programación como na ellaboración de conteníos dixitales que s’espublizarán nel canal de YouTube del Taller de Músicos”, esplicó Eduardo G. Salueña, direutor de programes de la entidá que collabora na organización d’esta actividá xunto de la Fundación Municipal de Cultura, Educación y Universidá Popular al traviés de la Oficina de Normalización Llingüística. Na presentación, celebrada nel Antiguu Institutu, tuvo acompañáu por Miguel Barrero, direutor de la Fundación.

Salueña quixo rescamplar tamién “l’usu de formatos nuevos a la hora d’enfocar los conciertos, que llamamos sesiones musicales, remitiendo a esi calter de sesiones de disc-jockey, de productores electrónicos, etcétera. Asina asitiamos esa escenografía que se sal del conciertu habitual”. Pa ello escoyóse tamién un allugamientu especial, el Muséu del Ferrocarril d'Asturies, concretamente l’andén principal, “pa destacar esi calter más industrial” de la propuesta sonora.

Sobre l’usu de la etiqueta ElectronicAst apuntó que “busca esa fusión de lo que ye la utilización de los medios electrónicos y una referencia a los elementos d’identidá y de raigañu asturianu”. Un panorama “mui ecléctitu nel qu’hai referencies al hip-hop, músiques urbanes, el folk más innovador y llinguaxes electrónicos más esperimentales ensin perder la idea de baille”.

Cuatro sesiones y trés vídeos

Fruela 757, proyeutu del productor Javi Suárez, “ún de los grandes esponentes d’esta música asturiana nueva na que se dan la mano eses tendencies urbanes, dende’l hip-hop al reggaeton y la música electrónica, y los soníos tradicionales”, va abrir los X Alcuentros de Músiques Asturianes –con sesiones siempre a les 20 hores con entrada llibre– el martes viniente. Al día siguiente, el miércoles 23, va tomar el relevu Tasio, alter ego de Dudu García, con una propuesta na que “interaiciona instrumentos en direuto con soníos folk y bases más cercanes al drum and bass o hardtek”.

Yá de xueves, va tar presente Bimenes UnderPrau, la iniciativa “multidisciplinar” de Pablo Martínez Testa “más enfocada a la narrativa sonora” na que les bases acompáñense tamién de voz y trompeta. De poner el ramu va encagase, el vienres, Llevólu’l Sumiciu, el dúu formáu por Pablo Alonso y David Alonso “onde se fusionen soníu (Pablo) y imaxe (David) pa crear un llinguaxe propiu onde s’encaxa eses melodíes y ritmos procedentes de la tradición asturiana con un tratamientu más contemporaneu”.

Completa la propuesta Tever, “gaiteru espertu na creación de conteníos dixitales y la fusión de tolo que tien que ver cola música tradicional y les nueves teunoloxíes”, que pa esta edición del ciclu creó trés vídeos n’eslusiva que se van espublizar “a partir d’esta fin de selmana” na canal de YouTube ‘Taller de Músicos Gijón-Xixón’. “Nellos fai un repás, y tamién un averamientu, a les diferentes propuestes en músiques populares urbanes que plantegaron caminos innovadores a partir d’esa incorporación d’elementos de raigañu musical asturiana y el tratamientu al traviés de les nueves teunoloxíes”, esplicó Salueña.

Na semeya, Salueña; Barrero; María Xosé Rodríguez López, responsable de la Oficina de Normalización Llingüística; y Fernando Oyagüez, téunicu del Taller de Músicos, na presentación d'esta mañana.

Contador Estadistiques