Los vascos Dupla estrenen el proyeutu Ixuxú Cultura sobre música en llingües minorizaes con compromisu social o fecha por muyeres

|
Dupla

El proyeutu ‘Ixuxú Asturies-Euskal Herria elkartea’ nació nel 2013 de la mano de Xicu Ariza pa mostrar la realidá asturiana n’Euskal Herria. Activu hasta’l 2018, de la so povisa naz agora Ixuxú Cultura, un proyeutu centráu na música en llingües minorizaes con compromisu social o fecha por muyeres que trai en marzu a Xixón y Uviéu a los vascos Dupla.

Nos sos 5 años de vida esta iniciativa entamó multitú d’actividaes, tanto n’Asturies como n’Euskal Herria. Una web y l’apertura d’una tienda en llinia, xerme de lo qu’agora ye Musicasturiana.com, foi una de les primeres aiciones de ‘Ixuxú Asturies-Euskal Herria elkartea’ pa convertilu nun “glayíu intercultural pa visibilizar aspectos d’Asturies, tantes vegaes invisibilizada y estereotipada”, esplicaba a esti mediu Ariza, naquel tiempu emigráu a Bilbao.

Llueu de la programación de presentaciones, charres y conciertos en tierres vasques, amás del asoleyamientu d’un dossier p’amosar la realidá social y cultural asturiana, el proyeutu evolucionó col pasu del tiempu y entamó a averar tamién a Asturies música fecha n’Esukal Herria y productos culturales d’esi país. Un intercambiu mui provechosu que desendolcó hasta un ciclu d’intercambios musicales ente grupos asturianos y vascos, en collaboración col coleutivu Glayíos, entituláu Glayíos/Oihuak nel que participaron grupos como La Tarrancha, Skama la Rede o Fabes de Mayo, per un llau, y Skakeitan, Gose o Suaia eta Lahaine, pel otru.

El proyeutu, paráu nel 2018, retómase agora baxo un conceptu nuevu y el nome Ixuxú Cultura, que collaborara na organización del esitosu Semando Fest. L’oxetivu, “trabayar con música interpretada en llingües minorizaes con un mensaxe comprometíu socialmente o desendolcada por muyeres”.

Pa estrenar esta etapa van viaxar a Asturies los vascos Dupla, “grupu de música urbana fecha nun entornu rural”, espliquen dende Ixuxú Cultura. Formáu nel 2020 por Beñat Oribe (batería) y Gari Uriart (guitarra y voz), y procedentes Agurain, sitiu que vio nacer a La Polla Records o Kaotiko, faen reggaeton y punk, rap y folk, y electrónica y rock, con lletres que falen de fiesta y llucha.

La primer cita va ser el vienres 10 de marzu en Xixón, a les 21 hores nel Dilema, y al día siguiente en L’Infiestu, a les 22 hores en La Traviesa. La entrada a los conciertos ye de baldre.

Contador Estadistiques