Ixuxú Cultura programa n'Uviéu a los navarros Tatxers y Skabidean

El proyeutu centráu en difundir música en llingües minorizaes o fecha por muyeres entama l'eventu Iruña-Asturies Clash xunto con Ximiélgalo Radio Show y L'Economatu Discos.

Depués de la bona aceptación de la visita de los vascos Dupla en marzu a Xixón y L'Infiestu, Ixuxú Cultura programa un conciertu nuevu, nesta ocasión de dos bandes de la capital navarra n'Uviéu. Son Tatxers, trés mozos que "recuerden a Hertzainak, a Kortatu, al punk-rock británicu del ‘77, y amás tienen unos ramalazos #pop que los convierte nun tríu adictivu enllenu personalidá", y Skabidean, formación de 11 integrantes con más de 10 años y 300 actuaciones al llombu que llamen al baille colos son cantares ska, rocksteady y reggae.

Completen la folixa Miguinah Selektah de Ximiélgalo Radio Show y Raúl de L'Economatu Discos con una seleición de música xamaicana con entrada llibre dende les 18.30 hores, pa depués siguir, dende les 21 hores, yá de pagu, con Tatxers y Skabidean. Los conciertos del Iruña-Asturies Clah van tener llugar el sábadu 30 con entrada a 12 euros de manera anticipada na plataforma Entradium y a 15, na puerta.