Los quesos DOP y IXP de 'Alimentos del Paraíso Natural' promociónense nuna feria en Zamora

La marca de calidá participa na Fromago Cheese Experience, certame de creación nueva que se celebra nel centru de la capital.

La Conseyería de Mediu Rural y Cohesión Territorial promociona quesos de la marca de calidá 'Alimentos del Paraíso Natural' na Fromago Cheese Experience que se ta celebrando en Zamora. Asturies acude a este evento, que s'allarga hasta'l domingu, con un puestu nel qu'ufre información y prebes de dellos quesos y productos del país.

En concreto promueve les denominaciones d'orixe protexida (DOP) Cabrales, Gamonéu, Afuega’l Pitu y Casín y la indicación xeográfica protexida (IXP) Beyos, amás de productos ecolóxicos col amparu del Conseyu de la Producción Agraria Ecolóxica del Principáu d'Asturias (COPAE). Per estos cuatro díes van entamase prebes d'estos quesos xunto con sidra y vino de Cangas, bébores tamién con DOP.

El país cuenta con 97 queseríes repartíes per tol territoriu nes que se faen más de 300 variedaes con carauterístiques organoléptiques diferentes "que lleven décadas creando ayalgues gastronómiques que ponen en valor Asturias", rescampló María Begoña López Fernández en Zamora. La direutora xeneral de Desarrollu Rural y Agroalimentación viaxó hasta Zamora pa la inauguración de la Fromago Cheese Experience y visitó'l puestu asturianu, asitiáu na plaza de Viriato, amás de percorrer el d'otres d'empreses privaes con presencia nel certame.

En total son más de 400 los esistentes, repartíos per tol centru de Zamora. La idea ye qu'esta feria del quesu, que lleva'l nome d'esti productu n'esperanto, tenga calter biañal.

Na semeya, Lluis Nel Estrada, direutor del Institutu Gastronómicu Asturianu, y López Fernández nel puestu asturianu.