Los promotores del manifiestu ‘Música n’asturianu sí’ esixen a Moriyón que se posicione y el cese d'Álvarez Rouco

4.200 persones, grupos y coleutivos sofitaron el manifiestu ‘Música n’asturianu sí’. Los sos promotores y entidaes de la sociedá civil xixonesa lleváronles pel Rexistru a grupos municipales xunto con una propuesta de moción y un comunicáu nel qu’esixe a l’alcaldesa Carmen Moriyón que “rechace contundentemente les palabres y les intenciones de la so compañera de gobiernu” y edil de Festexos, Sara Concepción Álvarez Rouco, asina como'l so cese.

La Plaza Mayor foi’l llugar escoyíu pa dar una rueda de prensa a la qu’acudieron numberosos músicos y ciudadanos pa sofitar el mensaxe del sector, al que s’incorporaron tamién la Sociedá Cultural Xixonesa; l’asociación Grana, N’Alcordanza de Yolanda Huergo; la Caja de Músicos; la Sociedad Cultural Gesto; y l’Atenéu Obreru de Xixón, “pol simbolismu que supón que dende la Casa’l Conceyu se nos quiera escluir d’actuar n’eventos festivos que se faen nesta mesma plaza y n’otros espacios públicos”. Leticia Baselgas y David Varela exercieron de voceros d’un comunicáu que contó con dos partes.

“Tamos ablucaos y tristes por tener que tar dando esta rueda de prensa. Pareznos surrealista tener que responder a unes intenciones tan graves como son les de nun querer programar música n’asturianu nos eventos festivos en Xixón”, arrancó la cantante y panderetera en L-R, ente otros proyeutos, que recordó que “estes declaraciones tuvieron 11 díes ensin matizase de nenguna manera y consideramos que, si tuvieron que rectificase en parte, foi pol descontentu social qu’ellos mesmos xeneraron”.

“Pero cola rectificación llegó un nuevu esperpentu; el de querer persiguir la llibertá d’espresión de los propios artistes. Por eso repetimos dalgunes de les preguntes que nos pasaron pela tiesta a lo llargo d’estos cuasi 15 díes: ¿Qué pasaría si en Barcelona se quixera prohibir actuaciones de música en castellano? De xuru que sería portada de tolos medios de comunicación. ¿Por qué van poder siguir viéndose actuaciones musicales d’artistes qu’apoyen a la llingua asturiana y la so oficialidá en Madrid, París, Beirut, Nueva York, Sidney o Buenos Aires, pero non en Xixón? Les respuestes son evidentes, porque ésto nun hai per onde lu garrar”, siguió Leticia Baselgas.

Sobre’l manifiestu ‘Música n’asturianu sí’, rescampló les 4.200 firmes verificaes nes que “ta representada prácticamente la totalidá de la escena musical n’asturianu, pero tamién munchos nomes y entidaes que faen música n’otres llingües, tanto de dientro como de fuera d’Asturies. Porque esti ataque nun ye namás hacia la música n’asturianu; ye un ataque qu’afecta a tol sector musical – independientemente d’en qué llingua canten–, a toles persones que crean y construyen la nuesa cultura n’Asturies, especialmente, a los que lo faen en llingua asturiana, y a toles y tolos falantes d’esti idioma. Amás, dende’l llunes tamién ye un ataque a la llibertá d’espresión”. Ente los nomes citaos, los de Rodrigo Cuevas, Hevia, Rozalén, Rigoberta Bandini, Vetusta Morla o Desakato, anque la llista amplíase muncho más.

Por último, recordó que la conceyala de VOX “atenta directamente contra l’artículu 20 de la Constitución referíu a la llibertá d’espresión” cola so intención, dada a conocer el llunes, “de programar a artistes o non en función de si canten n’asturianu o de cuála ye la so opinión sobre la oficialidá, volviendo a los tiempos de la censura previa”.

“En defensa y promoción de la música y cultura n'asturianu nos eventos” de Xixón

“Por eso tamos equí pa decir tamién qu’a unes declaraciones y intenciones tan graves nun se-yos da respuesta únicamente con un manifiestu como ésti”, tomó’l relevu Varela, qu’apuntó que “tampoco van quedar impunes nin silenciaes por munches cartes qu’escriba l’alcaldesa Carmen Moriyon a Gijón/Xixon tratando de blanquear les intenciones discriminatories de los sos socios de gobiernu. Queremos que se respeten los nuestros derechos y se cumplan les lleis; y necesitamos garantíes de que tolo que dixo la señora Rouco nun vaya facese realidá”.

“Y p’asegurar qu’esto nun pase nin esplícita nin implícitamente, vamos defendenos coles lleis. Que nos eventos festivos nun se contrate a artistes y entidaes qu’utilicen l’asturianu como llingua de creación o que manifiesten idees en favor del asturianu, ye una vulneración de derechos y amás supón l’incumplimientu de, polo menos, la Constitución española, Llei de Contratación Pública, la Llei d’Usu y Promoción del Asturianu y el Plan de Normalización Llingüística de Xixón”, siguió l’integrante de La Bonturné, ente otros munchos proyeutos.

Asina, los promotores del manifiestu presenten una propuesta de moción a los grupos muniucipales de la FSA-PSOE, Foro, Convocatoria por Xixón y Podemos “en defensa y promoción de la música y cultura n'asturianu nos eventos festivos, educativos y culturales de Gijón/Xixón” pa llevar a Plenu cola intención de que “esta ciudá garantice que pueda haber actuaciones d’artistes y entidaes qu’utilicen l’asturianu como llingua d’espresión. Que lo garantice y tamién que lo promueva a traviés de Divertia y de les conceyalíes de Festexos, de Cultura y d'Educación”. “Por supuesto, les llibres opiniones de los artistes a favor de la oficialidá del asturianu nun deben afectar nin lo más mínimo a la programación cultural y festiva”, añadió Varela.

Tamién esixen “una declaración per parte de l’alcaldesa de Xixón, Carmen Moriyón, na que rechace contundentemente les palabres y les intenciones de la so compañera de gobiernu. Que la máxima responsable nesta ciudá asegure qu’en Xixón nun va facese realidá esta discriminación que vulnera derechos y lleis”. Al respeuto, critiquen que “hubo un silenciu intolerable durante 10 díes per parte d’esta nueva corporación municipal y l’alcaldesa namás respondió con un artículu nel periódicu que nun garantiza nada nin rechaza les gravísimes declaraciones y intenciones de VOX”.

Por último, señalen que “creemos qu’una persona que quier discriminar a una parte de la población y del sector cultural asturianu, nun debería dirixir la conceyalía de Festexos d’esta ciudá”, polo qu’afirmen que “la tamién diputada autonómica y vicepresidenta de VOX Asturias, Sara Álvarez Rouco, debería ser cesada como conceyala de festexos de Xixón, lo que tamién implica que la empresa pública Divertia nun tendría de tar en manes de quien comparte esos mesmos planteamientos”.

Na semeya, Leticia Baselgas y Varela xunto con otros promotores y músicos que sofitaron el manifiestu.