4.200 firmes relevantes de la escena musical nacional y estatal sofitaron el manifiestu pola música n'asturianu

Grupos como Hamlet, SKA-P, Reincidentes o Vetusta Morla, y artistes como Fermín Muguruza, Xavi Sarrià, Rozalén o Rigoberta Bandini, ente los que roblaron el documentu de fuera del país.

La llista ye interminable y difícil de resumir nestes llinies. Foron 4.200 les firmes que sofitaron el manifiestu 'Música n'asturianu sí' énte "les intenciones de VOX de nun programar música n'asturianu nos eventos festivos de Xixón" que'l sector movió mientres la selmana pasada con siete puntos nos que se facíen referencia a los derechos llingüísticos, culturales y llaborales; la economía asturiana; el patrimoniu; la pluralidá de la música n’asturianu y l’ésitu de les actividaes festives nesti idioma; o la propia imaxe que laciudá quier amosar énte’l mundu.

Nuna mirada rápida a la mesma se pue atopar a la práutica totalidá de la escena musical asturiana, pero tamién nomes relevantes de la estatal. Asina, apaecen artistes como Fermín Muguruza, Xavi Sarrià, Rozalén o Rigoberta Bandini.

Ente los grupos, dalgunos bien conocíos como Hamlet, SKA-P, Reincidentes, Vetusta Morla, Dakidarría, Tahúres Zurdos, Lujuria, La M.O.D.A, Ladilla Rusa o Zoo. La llista complétase con multitú de nomes individuales del mundu de la música y la cultura.

Na semaya, un momentu de la rueda de prensa d'esta mañana frente a la Casa Conceyu, con Leticia Baselgas lleendo a los medios la primer parte del comunicáu.