Los esámenes oficiales d’asturianu del 2021 repetiríen un B2 y sumaríen otra prueba

|
Prueba B2 asturianu escrita

La Comisión Permanente Educación-Cultura valora convocar dos pruebes de certificación de conocimientu d’asturianu adaptaes al Marcu Común Européu de Referencia pa les Llingües nel 2021. Los 300 aspirantes que quedaron fuera esti añu pola llende de 500 matrícules podríen optar a facer el B2, mentes que s’estudia una segunda d’otru nivel y llegaría la primera de gallego-asturiano.

El desendolcu de la primer prueba oficial d’asturianu, n’ochobre, calificóse como “positiva” dende Política Llingüística, que felicita “a tol personal comprometíu nunes pruebes” que se fixeron “nunes condiciones difíciles por mor de la COVID-19”. Asina, cita “al personal técnicu d'Evaluación Educativa de la Conseyería d'Educación y al del Serviciu de Conocimientu de la Conseyería de Cultura que les punxeron en marcha, al grupu de trabayu qu'ellaboró los conteníos y al profesoráu qu'aplicó les pruebes. Y por supuestu a tola xente que se presentó a elles, demostrando qu'había interés, que yeren necesaries”.

De cara al añu qu’entra la idea prevista ye repetir la prueba del B2, a la que s’apuntaron cuasi 800 persones, quedando fuera 300 al ser 500 el tope de matrícules posibles. D’igual forma, valórase sumar una segunda prueba de los cuatro niveles restantes regulaos: los básicos A1 y A2, l’intermediu B1 o l’avanzáu C1.

Amás, va tratase na Comisión el decretu que regule les pruebes de certificación del gallego-asturiano y la convocatoria d'una primer prueba de nivel d’esti idioma.

Na semeya, una de les aules de la Facultá de Formación del Profesoráu y Educación de la Universidá d’Uviéu con aspirantes a la espera del entamu de la prueba escrita.

Contador Estadistiques