Educación tien la previsión de convocar l’esame oficial d'asturianu C1 amás del B2

Carmen Suárez Suárez, aconceyó esti vienres de manera telemática con Xosé Antón González Riaño, presidente de l’Academia de la Llingua Asturiana (ALLA), pa tratar dellos temes burocráticos sobre la Llei Celaá. Na xunta la conseyera treslladó la intención d’Educación-Cultura de que la prueba oficial d’asturianu d’esti añu que complete l'intermediu B2 sía l'avanzáu C1.

Ésti ye’l nivel máximu afitáu nel decretu qu'afita los niveles de competencia nel usu de la llingua asturiana adaptaes al Marcu Común Européu de Referencia pa les Llingües. D’esta forma la Comisión Permanente Educación-Cultura apuesta por dar continuidá esti 2021 a los aspirantes que sacaron l’añu pasáu’l B2, asina como ufrir la oportunidá d’esaminase nel intermediu a los 300 que quedaron fuera pol tope de 500 matrícules afitáu que nun tean capacitaos pa presentase al avanzáu.

La intención del alcuentru yera tratar temes burocráticos referíos al desarrollu de la Llei Orgánica de Modificación de la LOE (LOMLOE), conocida como Llei Celaá, “como los decretos de los currículos, la organización horaria y la pertinencia de la voluntariedá del asturianu nes enseñances derivaes de l’aplicación de la llei nueva y del procesu d’inscripción y matriculación del alumnáu pal cursu próximu”, anunciaron dende Educación. Entrugáu por Asturies.com, González Riaño apuntó que se trató d’un axuntamientu rutinariu y rescampló’l “bon clima y bona rellación cola conseyera”.

Tamién de gallego-asturiano

Educación tamién confirmó la voluntá de desendolcar el decretu que regule les pruebes de certificación de gallego-asturiano y la convocatoria de pruebes oficiales d’esti idioma esti mesmu añu. Otra manera, apuntó la intención d’algamar la regulación pa que la inscripción nel Rexistru Xeneral de Capacitación tenga en cuenta el Grau Mención Minor n’Asturianu de la Universidá d’Uviéu, en trámite pa ser informáu pol Conseyu Escolar.

Na semeya, Suárez Suárez nel so despachu con González Riaño en pantalla.