Los defensores de les llingües minorizaes del Reinu Xuníu nun sofiten la salida de la Xunión Europea

Esti xueves los ciudadanos del Reinu Xuníu van votar en referéndum si quieren permanecer na Xunión Europea (XE) o non, no que se fai llamar 'Brexit'. Los coleutivos de defensa de les llingües minoriaes del Estáu británicu creen que la salida de la xunión económica sería perxudicial pa estos idiomes.

Grupos y activistes que defenden el córnicu, el galés, el gaélicu escocés y l'irlandés roblaron una carta conxunta, sofitada por European Language Equality Network (ELEN), na que piden el votu pa la permanencia na XE al entender que col Reinu Xuníu fuera de la Xunión Europea les polítiques en materia llingüística serán restrictives. "Tememos que'l 'Brexit' nos lleve a un futuru inciertu pa les nueses comunidaes llingüístiques, como asocedió cola abolición reciente por parte del Gobierno de la financiación del córnicu", afirmen.

La política de defensa hacia les llingües minorizaes de la XE ye pa estos coleutivos y personalidaes una baza importante pa la sobrevivencia d'estes llingües, polo que deciden tomar esta postura frente al 'Brexit'. "Nós, como representantes de las comunidaes llingüístiques minoritaries natives d'estes isles, queremos garantizar la seguridá y la prosperidá de les nueses llingües y les sos comunidaes,  pa lo que debemos permanecer dientro de la Xunión Europea; contribuyir al so desarrollu como un proyeutu de derechos humanos, como garante de la paz, la xusticia social, la cooperación y la igualdá d'oportunidaes pa los pueblos del nuesu continente, y por una Europa xunida na diversidá".