Los 5 puntos irrenunciables nel mandatu-marcu de la RTPA: un "compromisu cola normalización"

Nel 2016 un informe d’Iniciativa pol Asturianu entituláu ‘Una RTPA pa la próxima década’ facía una propuesta de redaición pal mandatu-marcu quei tenía la so base nel documentu impulsáu pola Xunta pola Defensa de la Llingua Asturiana nel 2014.

Esi añu, cola llei de reforma del sector públicu que regularía la RTPA en fornu, la sociedá asturiana movilizaríase. Nel llar social de l’Academia de la Llingua Asturiana axuntaron nel mes de febreru representantes de los firmantes pa presentar un documentu con 5 puntos “irrenunciables” nel que demanden “unos medios públicos al serviciu d’Asturies”, los siguientes:

1. RTPA tien qu’ufrir un serviciu públicu pa la sociedá asturiana al traviés d’una programación de calidá nes llingües propies d’Asturies, plural y respetuosa coles audiencies, con conteníos empobinaos al interés públicu y de producción propia, asumiendo un rol compensatoriu d’otres cadenes públiques o privaes.

2. RTPA tien que cumplir l’oxetivu fundamental d’impulsu y normalización del asturianu y del gallego-asturianu.

3. RTPA tien que ser exemplar nel so compromisu colos elementos fundamentales y actuales de la cultura asturiana.

4. RTPA tien que ser un referente nel panorama audiovisual asturianu, convirtiéndose nel principal impulsor del mesmu.

5. En resume, RTPA, como serviciu públicu que ye, ha contribuir al procesu de normalización social del asturianu y gallego-asturianu, garantizando l’accesu de la ciudadanía a conteníos na llingua propia en tolos xéneros y promoviendo una industria audiovisual que garantice la producción d’estos conteníos.

Llegaría la Llei 8/2014, de 17 de xunetu, de Segunda Reestructuración del Sector Públicu Autonómicu, pero non el mandatu-marcu que marca l’artículu 3. “Los oxetivos xenerales de Radiotelevisión del Principáu d’Asturies, SAU, afitaráse nel mandatu-marcu”, manda’l puntu 1, con “una vixencia de nueve años” (puntu 2) teniendo que tar “ellaboráu pola Comisión de la Xunta Xeneral del Principáu d’Asturies prevista nel artículu 34 y aprobáu pol Plenu de la Cámara por mayoría absoluta en primera votación y mayoría simple nes posteriores, debiendo mediar ente cada votación polo menos cuarenta y ocho hores” (puntu 3).

Un mandatu-marcu que, según la norma, “será aprobado pola Xunta Xeneral del Principáu d’Asturies nel plazu de seis meses dende la entrada a valir de la presente llei”. Sicasí, nun sería hasta febreru de 2024, diez años depués, cuando se designaría la ponencia que se ta encargando de la so ellaboración.

Ampliación del puntu 5

Consciente de la importancia de la RTPA pa la normalización del idioma, Iniciativa pol Asturianu dos años depués, y énte la pasividá política, asoleyó’l documentu ‘Una RTPA pa la próxima década. Informe d’Iniciativa pol Asturianu con un analís de los diez años caberos y propuestes llingüístiques y culturales pal Mandatu Marcu’ col oxetivu de “apurrir propuestes pa da-y utilidá social a la RTPA nos vinientes diez años, convirtiéndola nuna ferramienta eficaz na tresmisión del asturianu y na vertebración d’Asturies”.

Na presentación, l’entós presidente Inaciu Galán afirmó que “foi l’asturianismu quien siempres tuvo ente los sos oxetivos cuntar con una radiotelevisión pública asturiana” y que les propuestes “faense col envís de da-y viabilidá a esti proyectu, que de siguir na llinia actual pue tener un difícil sostenimientu nel futuru”.

La organización consideraba que’l “primer mandatu marcu de la sociedá Radiotelevisión del Principáu d’Asturies SAU ha valir pa correxir los problemes detectaos nel analís de los diez caberos años. Lo primeru que tien que facer el futuru documentu ye reconocer como una de les misiones del serviciu públicu audiovisual n’Asturies la de normalizar socialmente l’asturianu.

La única manera de normalizalu ye ufiertar conteníos de calidá en tolos xéneros y formatos, con corrección llingüística, adecuadamente promocionaos y n’horarios afayadizos pa esos finxos”.

Asina, l’informe incorpora na parte so parte final una propuesta de redaición pa incluyir en dichu mandatu-marcu que tenía base nel puntu 5 del testu del 2014, del que foi firmante Iniciativa pol Asturianu. Ye la siguiente:

RTPA, como serviciu públicu que ye, ha contribuir al procesu de normalización social del asturianu y gallego-asturianu, garantizando l’accesu de la ciudadanía a conteníos na llingua propia en tolos xéneros y formatos, qu’han ser adecuadamente promocionaos y emitíos n’horarios afayadizos pa esti fin; afalando, de pasu, una industria audiovisual propia que garantice la producción d’estos conteníos y asumiendo un rol compensatoriu respectu a otres cadenes públiques o privaes. RTPA tien que ser exemplar nel so compromisu colos elementos fundamentales y actuales de la cultura asturiana, renunciando a siguir les dinámiques propies de los otros medios de comunicación con presencia n’Asturies.

"Ésta ye la única forma qu’entendemos dende Iniciativa pol Asturianu pa consiguir una radiotelevisión al altor de les circunstancies sociollingüístiques d’Asturies. Una RTPA que seya útil pa recuperar l’autoestima de los asturianos y les asturianes al rodiu de la so llingua y cultura propies. Tenemos la oportunidá de camudar la situación de la RTPA al traviés d’esti nuevu Mandatu marcu, que va afitar la forma de trabayar la próxima década. Nun podemos dexar pasar esta oportunidá hestórica pal asturianu, p’Asturies y pal propiu ente", dicía entós esti coleutivu.

Na semeya, Movilización de la Xunta pola Defensa de la Llingua Asturiana énte la sede de la RTPA.