Lombardía va falar de 'El celtismu del sieglu XXI' na charra d'Ástura

El médicu y etnógrafu reflexona nel Atenéu Obreru de Xixón sobre la trescendencia del componente célticu na nuesa identidá.

'El celtismu del sieglu XXI. De la reivindicación de los oríxenes al horizonte creador del interceltismu' ye'l nome de la charra que va poner Lisardo Lombardía esta tarde dientro del ciclu de conferencies mensuales d'Ástura sobre cultura asturiana. El que fora per 14 años direutor del Festival Interceltique de Lorient, hasta'l 2021, "ta anguaño enfotáu na reflexón sobre la trescendencia del componente célticu nel nuesu patrimoniu cultural y la nuesa identidá, convencíu de qu'esta dimensión cultural –mui alloñada d'un etnicismu esencialista– ye un elementu imprescindible del futuru d'Asturies", apunten dende Ástura sobre les cuestiones que va tratar na charra prevista a les 19 hores.

"La cultura celta reapaez na historia como poco dende entamos del sieglu XIX. El romanticismu xuega un papel mayor nel espardimientu de la importancia de esa cultura antigua, sobre manera dende la obra 'Los Poemes d’Ossian' del escritor escocés James Mc Pherson (1765) y na Bretaña Armoricana cola esencial antoloxía de cancios populares 'Barzaz Breizh' (1839) del vizconde Théodore Hersart de la Villemarqué", espliquen dende l'asociación cultural, que recuerda que "el mesmu Lisardo Lombardía espublizó na revista 'Cultures' l'ensayu 'L’interceltismu musical: una construcción bretona. Del 'Barzaz Breizh' al 'Festival Intercélticu de Lorient' (2018). Los celtes, les sos llingües –hasta entós arrequexaes– y la so cultura, algamen un puxu de gran potencia ideolóxica que va a encadarmar bien d'identidaes n'Europa, sobre manera nel Arcu Atlánticu".

"Nel sieglu XX la evolución de l'arqueoloxía, y los estudios etno-hestóricos y llinguísticos permitieron un analís fondu d'esti pueblu y la so hipotética herencia cultural, siendo a estremar lo que yera artificiu y "celtomanía" de les sos ayalgues y auténtiques aportaciones culturales n'abondos casos inda rastrexables y vixentes", siguen introduciendo. "El debate sobre'l celtismu sigue abiertu y lo será por bien d'años, porque'l celtismu nun sólo foi a inxertase nel imaxinariu coleutivu de munchos pueblos que reivindiquen la so herencia na cadarma de la so identidá, sinon que, amás, convirtióse nun elementu d'altor pa la creación artística de toa mena. Nesa nueva realidá, ye l'interceltismu, l'intercambiu ente los países qu'afiten el so raigañu celta, un elementu fundamental na creación contemporánea, non solo na música, sinón na lliteratura y nel arte d'anguaño", apunten.

Por último, conclúin que "l'Interceltismu y la so espresión creadora ye l'espeyu d'un celtismu que refugó dende'l principiu tou etnicismu esencialista pa camudar nun referente de creación cultural llibre y abierta cola identidá como aniciu y l'humanismu como horizonte. Esa ye la realidá y el retu del celtismu del sieglu XXI".