Ástura presenta'l procesu de restauración d'una pieza barroca na so charra mensual

Natalia Díaz-Ordoñez va detallar nel Atenéu Obreru de Xixón los trabayos sobre un retablu de Bernardo de la Meana na catedral d'Uviéu.

'Desmontando'l barrocu. Restauración d'un retablu de Bernardo de la Meana na catedral d'Uviéu' ye'l nome de la conferencia de xineru sobre cultura asturiana d'Ástura. L'actu va tener llugar esta tarde, dende les 19 hores, con entrada llibre hasta completar aforu.

"Vamos ver cómo ye'l procesu de restauración d'un retablu barrocu, procesu nel que remanecen munchos detalles sobre los materiales, les téuniques pictóriques y de doráu, el contestu históricu o los sistemes constructivos necesarios pa caltener de pies estes pergrandes construcciones en madera", apunten dende l'asociación cultural. "Un retablu barrocu ye, non yá un fabulosu exemplu de precisión téunica, sinón tamién de desenvolvimientu intelectual, pues –na so cadarma y nes sos imaxes y talles– nada ta fecho al debalu", añaden.

La convidada pa falar d'esti tema nel llar social del Atenéu Obreru, asitiáu na segunda planta de la Escuela de Comerciu Antigua, ye Díaz-Ordoñez, diplomada en Caltenimientu y Restauración de Bienes Culturales, na especialidá de Pintura, pola Escuela Oficial de Madrid y Grau pola Escuela Oficial de Pontevedra, amás d'esperta en Restauración de Piedra pola Universidá d'Uviéu. Tamién cursó Restauración de Pintura Contemporánea nel Museo Nacional Reina Sofía y una llarga trayeutoria na restauración de pieces y pintures murales, y rehabilitación d'edificios singulares.

Semeyes del cartelu propiedá de Juanjo Arrojo.