L’ociu nocherniegu va finar a les 2 de la madrugada

El Gobiernu va asoleyar esti miércoles una resolución con llendes al ociu nocherniegu pa tratar de frenar l'espardimientu del coronavirus SARS-CoV-2. Los veceros namái van poder ocupar meses instalaes nos llocales y la hora de pieslle va ser les 2.

El direutor xeneral de Cuidaos, Humanización y Atención Sociosanitaria, Sergio Valles, adelantó dalgunes de les midíes que va tomar el Gobiernu que van quedar afitaes nuna resolución que va aprobar mañana’l Conseyu de Gobiernu. Ente elles rescampla’l pieslle de tolos llocales a les 2 de la madrugada, asina como la obligatoriedá de servir a los veceros en meses, impidiendo asina que puedan tar de pie nos establecimientos.

D’igual forma recomienda a los chigres el disponer d’un rexistru de clientes y usuarios. Nel mesmu quedaríen inscritos los datos de les persones que pasen pelos llocales pal so siguimientu en casos de biltos como’l de la cervecería de La Corredoria.