Llanes y CD Tuilla xueguen pol primer títulu de la temporada

Santa Cruz acueye la final de la Copa Federación na so fase autonómica, que va presentar Naciu Varillas n'asturianu.

Un Llanes que busca estrenase nel palmarés d'esti tornéu na so segunda final depués de llegar a la de la temporada 1999-2000 (5-0 col Marino) va enfrentase esta tarde en Xixón con un equipu que yá sabe lo que ye llevantar el troféu en 3 ocasiones, el CD Tuilla, la última na campaña 2011-2012. En semifinales los llaniscos superaron la selmana pasada por 2-0 al Llanera y los dinamiteros al Caudal por 1-0, alcuentros dambos a partíu únicu nel mesmu campu del choque de güei, el del UD Gijón Industrial con motivu del cincuentenu aniversariu del club fabril.

Diego Valdés Díaz, del colexu d'Uviéu, va encargase d'arbitrar el partíu, con comienzu previstu pa les 19.30 hores. El preciu de la entrada ye de 6 euros, con accesu llibre pa los menores de 15 años.

Cuatro places pa la Copa

El ganador d'Asturies de la Copa Federación va ganar plaza pa la fase estatal, que da cuatro places pa xugar la Copa del Rei. Los equipos que clasifiquen pa semifinales van recibir esi derechu esta temporada.

Los presidentes del Llanes, Juan José Fernández González, y Tiuya, José Enrique López Arbesú, posen tres el troféu. Semeya propiedá de la Real Federación de Fútbol del Principáu d'Asturies.