El Llanes consigue la so primer Copa Federación

Lleva la fase asturiana de la competición tres superar al CD Tuilla (2-1) en Santa Cruz con un gol de Dorronsoro nel tiempu añadíu.

El Club Deportivo Llanes, na so segunda final, llevantó en Xixón el so primer títulu oficial dende la so fundación nel 1949. Un trunfu que nun-y resultó cenciellu énte un gran rival y que-y permite algamar el pase a la fase estatal de la competición, que da la posibilidá de ganar plaza pa la Copa del Rei.

Tres una primer parte mui igualada y con poques ocasiones, el partíu revitalizóse na segunda metá. El Tiuya foi'l primeru n'adelantase nel marcador, nel minutu 58, con un remate de cabeza de Nacho Velardi, pero los llaniscos reaicionaron y pudieron igualar nel 74 con un tantu d'Ivanchu, tamién cola tiesta, xugador que saliera del bancu pa revolucionar el partíu.

Colos nervios típicos d'una final afrontaron dambos equipos los minutos finales. Foi nel añadíu cuando se decidió'l choque, en concreto nel 93, cuando Dorronsoro enganchó un balón dientro l'área tres favorecese d'un rebote y nun perdonó, dando al Llanes la Copa Federación 2019-2020.

Semeya propiedá de la Real Federación de Fútbol del Principáu d'Asturies.