Llanes sigue coles restricciones del 4+, pero con movilidá cuando fine l'estáu d'alarma

|
Escudu de Llanes

Ye'l primer conceyu n'adaptase a los cambios nesti nivel d'alerta dende'l domingu. El miércoles hebo 49 contaxos y nenguna muerte per segundu día siguíu.

Esta medianueche fina la declaración del 4+ en Llanes, pero la situación epidemiolóxica del conceyu obliga a la so prórroga. El conocíu fin del estáu d'alarma'l día 9 impide la restricción de movilidá y reunión, polo que'l Gobiernu nun va poder caltener el zarru perimetral nin la llende de 6 persones nos axuntamientos, al igual que'l toque de queda.

Sicasí, van siguir les restricciones venceyaes a esti nivel d'alerta, como la imposibilidá de la hostelería d'usar los interiores. El martes la incidencia a 14 díes en Llanes yera de 297 casos cada 100.000 habitantes, primer xornada na que se baxa de la llende de 325.

Baxen les hospitalizaciones

A falta de la espublización de los datos oficiales de la COVID-19, la Conseyería de Salú comunicó 49 casos ayeri –l'actualización rexistra 4 menos por duplicaos de díes anteriores–. Son 2 menos que'l día anterior.

El Serviciu de Salú del Principáu d'Asturies (SESPA) fixo 3.727 pruebes de diagnósticu d'infeición activa, polo que la tasa de positividá s'asitió nel 2,68 por cientu, mentes que'l martes foi del 3,14 por cientu. A 7 díes esti porcentaxe yera esa xornada del 4,27 por cientu –ayeri baxó al 3,88 por cientu–.

Nun hebo finaos cola enfermedá causada pol coronavirus SARS-CoV-2, polo que'l total del andanciu caltiénse en 1.948 dende'l llunes. Siguen hospitalizaos 134 persones con confirmación o sospecha de COVID-19, a los qu'hai que sumar los 48 pacientes que tán na UCI, 5 menos que'l martes.

Contador Estadistiques