El 92 por cientu de la población de 70 a 79 años yá recibió una dosis

|
Vacunación en Parque Astur a persona de 70 a 75 años

Tien la pauta completa un 17 por cientu de los asturianos. El martes rexistráronse 51 contaxos.

La campaña de vacunación sigue avanzando y un 92,23 de les persones de 70 a 79 yá recibieron una dosis, un total de 100.755 –refugaron l'alministración 1.071–. D'ellos 4.350 tienen yá inmunidá al recibir la de Janssen, que ye monodosis, y 40.566 la pauta completa de la de Pfizer, polo qu'un 41,56 por cientu yá cuenta cola resistencia máxima a la COVID-19.

Nel casu de les persones de 60 a 69 años, que se ta vacunando con AstraZeneca mayormente, un 57,51 por cientu yá recibió'l primer pinchazu. La pauta completa tienla un 8,37 por cientu d'esti grupu d'edá.

En términos totales, un 19,93 por cientu de la población diana dispón d'inmunidá, un 17,63 por cientu del total, esto ye, 179.620 asturianos. Con una dosis hai 348.669, un 38,69 por cientu de la xente a vacunar (un 34,22 por cientu de los asturianos).

Ensin finaos

A falta de la espublización de los datos oficiales de la COVID-19, la Conseyería de Salú informó ayeri de 51 casos nuevos –l'actualización suma 2 más non contabilizaos en díes anteriores–. Son 20 menos que'l llunes, cuando se comunicaron 71.

Fixéronse 3.125 pruebes de diagnósticu d'infeición activa y la tasa de positividad asitióse nel 3,14 por cientu, inferior tamién a la de la xornada previa, cuando quedó nel 4,21 por cientu. A 7 díes esti porcentaxe taba hasta enantes de l'actualización nun 4,47 por cientu –ayeri baxó al 4,27 por cientu–. 

Nun hebo que llamentar perdes, polo que'l total de finaos nel andanciu sigue en 1.948. La cifra d'hospitalizaos ye de 134 pacientes con confirmación o sospecha de COVID-19, 17 menos que'l llunes, a los qu'hai que sumar 53 que tán ingresaos na UCI, 2 más.

Na semeya, una persona del grupu d'edá de 70 a 79 años recibe la vacuna en Parque Astur.

Contador Estadistiques