Dobra, Corquiéu y la gallega Susana Seivane actúen na esplanada de La Esposición, mentes que Muga, 'Bestiariu' y L-R, con un conciertu especial, fáenlo en Xixón.
La música de raigañu atlánticu toma estos díes Avilés y Xixón. Celébrase'l XXIII Festival Intercélticu d’Avilés y Comarca y el VIII Festival Arcu Atlánticu, dos cites que nos traen a Asturies a artistes y bandes de gran calidá con propuestes bien interesantes.
Los qu'opten pol certame avilesín van poder disfrutar güei de la Nueche Céltica (22.30 hores), cola participación de Dobra, la formación liderada por Xuacu Amieva, y un clásicu del folk asturianu como Corquiéu. Mentes, mañana va ser el turnu de la Nueche Intercéltica (23.15 hores), con Fontoria y los gallegos Lume de Biquiera y la gaitera Susana Seivane, a lo qu'hai que sumar una gran cantidá d'actividaes a los llargo del tola fin de selmana, con mercáu y muncha gastronomía.
Mentes, les persones que s'averen a Xixón van poder presenciar la primer actuación n'Asturies del triu asturbretón Muga, que se desplacen dende An Oriant pa presentar ‘Chants de femmes des Asturies’ (20.30 hores, patiu del Centru de Cultura Antiguu Institutu), conciertu nel que va participar Pablo Texón cola llectura de los testos que fixo pa esta propuesta. Na Plaza Mayor, mentes, va actuar a les 22 hores Anabel Santiago.
'L-R & Amigues'
Mañana, a les 13 hores, la reciella va poder disfrutar na plaza de La Corrada d'una esbilla de los discos de ‘Bestiariu’ –editaos por Araz, empresa editora tamién d’Asturies.com–. Yá de nueche na Plaza Mayor (22 hores), el dúu L-R va ufrir un conciertu especial baxo'l títulu 'L-R & Amigues', nel que Leticia Baselgas y Rubén Bada van acompañase de Silvia Quesada, Mapi Quintana, Eva Tejedor, Merce Santos, Andrea Joglar, Marga Lorences y 6 Riales.
"L' oxetivu ye xuntar nel mesmu escenariu a les grandes protagonistes de la música tradicional y folk d'Asturies y visibilizar inda más la so presencia y relevancia na escena cultural asturiana", apunta Leticia. El grupu Prau Llerón tará dinamizando l'actuación col baille.
Pa zarrar l'Arcu Atlánticu, el domingu, tamién a les 22 hores na Plaza Mayor, la Banda de Música de Xixón va presentar el programa 'Ellas'. Amás de los conciertos, tamién hai una destacáu programa cultural pa estos trés díes centraos sobre manera n'El Muelle y Cimavilla.
Adxuntu | Tamañu |
---|---|
![]() | 638.26 KB |
![]() | 1.68 MB |