“La xente que s’avera al Intercélticu d’Avilés sabe que va atopar actuaciones de calidá”, destaca Casas

|
XXII Festival Intercélticu d'Avilés y Comarca

L’esitosu Banquete Celta Temáticu va encargase d’abrir esti sábadu’l XXIII Festival Intercélticu d’Avilés y Comarca, que se va allargar hasta’l día 28. Llucha celta, un alcuentru d’academies de danza y actuaciones de la Orquesta Céltica Asturiana, Dobra, Corquiéu o la gallega Susana Seivane conformen l’ampliu programa.

“La xente que s’avera al Intercélticu d’Avilés, anque nun conoza a la formación que toque o baille, sabe que va atopar actuaciones de calidá”, destaca Juan Luis Casas, presidente d’Esbardu, coleutivu organizador d’un certame xunto col Conceyu que nos años últimos, col cambiu a la esplanada de La Esposición, ta viviendo un espoxigue. “Ye un espaciu mui ampliu, con una zona pa conciertos, otra gastronómica, pa neños… Créase un ambiente mui guapu ellí”, añade, al tiempu qu’agradez la collaboración de les ediles Ana Hevia y Yolanda Alonso pa qu’esti cambiu fora una realidá.

El puntu fuerte del festival ye, como siempre, la música. Son munches les actuaciones programaes tanto n’Avilés como na so redolada, con actividaes en Pravia’l vienres 26 y en Corvera’l día siguiente.

Ente los conciertos previstos destaca la Nueche Céltica del vienres 26 (22.30 hores), cola participación de Dobra, la formación liderada por Xuacu Amieva, y un clásicu del folk asturianu como Corquiéu, y la Nueche Intercéltica del sábadu 27 (23.15 hores), con Fontoria y los gallegos Lume de Biquiera y la gaitera Susana Seivane.

Tamién va ser una xornada especial la del martes, con una Nueche Celta (22.15 hores) cola Orquesta Céltica Asturiana, que va tar acompañada pol gaiteru flamencu Jean Pierre Van Hees y la so discípula gallega Nadia Vázquez. Son munches les formaciones de fuera del país que van participar nel Intercélticu, como Melkisideck, “banda de la Patagonia formada por aficionaos a la música irlandesa que conocieron a emigrantes galeses y faen una fusión de música irlandesa y galesa”, los aragoneses Lugh y el tenor escocés Alan Beck.

Tamién participen les bandes de gaites escoceses Strathaven Pipe Band y Dunbar Highland Dancers, ésta última con cuerpu de baille, y l’agrupación de baille irlandesa Trim The Velvet y la gallega Celme. La representación asturiana va completala’l Grupo de Baile y Bandina del Centro Asturiano de Bruselas, la Banda de Gaites y el Grupu de Baille Tradicional de Corvera d'Asturies, la Banda de Gaitas del Centro Asturiano de Oviedo y el tríu formáu Rubén Tamargo, Fernando Pérez y Roberto Junquera, amás de la organizadora Esbardu.

Llucha celta y danza

Ente les novedaes que se sumen al programa del XXIII Festival Intercélticu d’Avilés y Comarca rescampla l’amuesa de llucha celta prevista’l domingu a les 19.45 hores, en concreto de baltu por parte asturiana y aluche por parte lleonesa. Va ser tres una charra entamada en collaboración cola Lliga Celta d’Asturies que va afondar nel procesu de recuperación d’estos deportes (19 hores), y d’otra sobre ‘El celtismu nel noroeste peninsular’ (18 hores).

Darréu va tener llugar el I Alcuentru d’Academies, Grupos de Danza y Rítmica, que tien como oxetivu emponderar “el nexu común de la música celta”. Nél van participar los llocales Estudio de Danza Step y Club Gimnástico Valoe, el ḷḷuarqués Club Recta Final, l’escocés Dunbar Highland Dancers y el Grupo de Baile y Bandina del Centro Asturiano de Bruselas.

El programa d’esti festival complétase con esposiciones, actuaciones artístiques na cai o prebes de sidra, ente otres munches actividaes.

Lugh, nel Banquete Celta

Ún de les cites más esperaes del certame ye’l Banquete Celta Temáticu, na que tol mundu qu’acude ha de dir carauterizáu con indumentaria celta, que va contar un añu más cola ambientación musical de Lugh. Va tener llugar el sábadu, na primer xornada del Intercélticu –qu’abre les sos puertes a les 13 hores–, a les 20.30 hores, y va contar con un menú formáu por empanada, ensalada de llechuga y tomate, y asáu de gochu asturcelta, amás d’una llambionada y pan.

El so preciu ye de 25 euros y inclúi agua, vinu o cerveza, café y llicor, y poción máxica. P’acudir ye necesariu acutar plaza enantes de que fine mañana.

Contador Estadistiques