L’horru d’El Pedrosu va reconstruyise utilizando les pieces reaprovechables

|
Horru d'El Pedrosu en Vis cayíu xeneral

El Conseyu de Patrimoniu encamentó a la propiedá del horru d’El Pedrosu, con pintures de la francesada, qu’esbarrumbó’l 4 de xunu, a que presente un proyeutu pa la so reconstrucción utilizando les pieces reaprovechables. Los vecinos de Vis encargáronse de recoyer les pieces pintaes, guardaes nun almacen, pa que nun se perdieran.

Téunicos de la Direición Xeneral de Cultura y Patrimoniu acudieron al llugar díes depués pa facer una inspeición de los restos del horru. Según tresmitieron a Asturies.com tres una consulta d’esti mediu dixital, nel 2018 el Conseyu de Patrimoniu “analizó la situación del horru y plantegó l’adopción de midíes de proteición urxentes”, que nun sirvieron pa evitar la so cayida.

Agora, dichu Conseyu ta acabante d’encamentar a los propietarios la ellaboración d’un proyeutu “pa la so reconstrucción utilizando les pieces reaprovechables”. Ente elles tán les pintaes, que los vecinos del pueblu s’encargaron de recoyer y que los dueños del horru guarden nestos momentos nun almacen pa protexer la so conservación.

El Conceyu d’Amieva yá ye conocedora de la intención de reconstruyir l'horru y los habitantes de Vis celebren esta decisión y que quede nel pueblu. La conseyera de Cultura, Política Llingüística y Turismu, Berta Piñán, va responder esta tarde na Comisión de la Xunta Xeneral a una entruga de Podemos sobre “qué midíes tien previstes la so conseyería pa evitar que bienes señeros del patrimoniu etnográficu asturianu sufran abandonu, graves daños, destrúyense o desaníciense, como nel casu del horru d’El Pedrosu, en Vis”.

Na imaxe, l'horru d'El Pedrosu poco depués de cayer. Semeya obra de Toño Sánchez Cueto.

Contador Estadistiques