Les pruebes de certificación d’asturianu incorporen al B2 y C1 el nivel básicu A2

La convocatoria del 2024 de les pruebes de certificación de Llingua Asturiana adaptaes al Marcu Común Européu de Referencia pa les Llingües vien con novedá. Éstes son les feches, plazos de matrícula y númberu de places pa caún de los niveles.

Al nivel intermediu B2 y al avanzáu C1 incorpórase esti añu’l primeru de nivel básicu, en concretu un A2. Quedaríen entós por entamar l’A1 y B1 d’ente tolos niveles establecíos nel decretu del 2019.

Ésta ye la quinta convocatoria d’un B1 dende’l 2020 y la cuarta del C1, esámenes polos que yá pasaron más de 1.500 aspirantes. L’apertura al nivel básicu de xuru que va animar a más persones a certificar oficialmente’l so nivel d’asturianu.

El 28 de setiembre, les pruebes escrites

Los esámenes van celebrase a partir del sábadu 28 de setiembre, cuando va tener llugar el bloque escritu. L’oral, al que se convoca de manera individual, va principiar el 7 d’ochobre y va tener llugar peles tardes.

Pal B1 y C2 nun hai llende places, mentes que pal A2 va haber un máximu de 200 –nel casu de que se supere esa cifra va procedese a la inscripción por orden alfabéticu inversu dende les dos primeres lletres del apellíu ‘Ls’, como marca’l sortéu fechu’l mes pasáu pa l’almisión d’alumnes y alumnos–. El plazu de matrícula nos institutos Aramo (Uviéu), Calderón de la Barca (Xixón), Carreño Miranda (Avilés) y Bernaldo de Quirós (Mieres) va abrise’l 22 d’esti mes y vas pesllase’l 10 de mayu, y les persones aceptaes van tener del 4 al 17 de xunu pa abonar los 31,63 euros de les tases.

Entovía nun hai confirmacion del llugar de les pruebes, anque toos estos años vien celebrándose n’Uviéu. Pa ser declaráu aptu y algamar asina’l certificáu de nivel l’aspirante ha aprobar les cinco partes y tener una media superior a 6: producción y coproducción de testos escritos, comprensión de testos orales y comprensión de testos escritos, que conformen el bloque escritu, y producción y coproducción de testos orales, y mediación, que son la parte oral del esame.

Na semeya, momentos previos a una de les pruebes del bloque escritu de la convocatoria del añu pasáu nuna de les aules habilitaes na Escuela Oficial d’Idiomes d’Uviéu.