Les pruebes de certificación B2 y C1 de Llingua Asturiana contaron con 218 aspirantes

Con cambiu d’escenariu con respeuto a convocatories anteriores celebróse esti sábadu’l primer bloque de les pruebes de certificación B2 y C1 de Llingua Asturiana adaptaes al Marcu Común Européu de Referencia pa les Llingües del 2023. La Escuela Oficial d’Idiomes d’Uviéu acoyó esta cuarta cita, pa la que se matricularon 218 persones.

A partir de les 8.30 hores taben convocaos los aspirantes del nivel avanzáu C1 y a les 8.40 los del nivel intermediu pa la so identificación previa a la realización de les pruebes escrites, esto ye, producción y coproducción de testos escritos, compresión de testos orales y comprensión de testos escritos. La novedá foi’l cambiu de sede, yá que los trés anteriores esámenes fixéronse na Facultá de Formación del Profesoráu y Educación de la Universidá.

En total yeren 218 persones, 89 matriculaes pal primeru y 129, pal segundu, les qu’abonaron los 31,63 euros de tasa y teníen plaza. Estos aspirantes a contar col certificáu que demuestra’l so dominiu del idioma van completar l’esame cola realización de les pruebes orales, producción y coproducción de testos orales y mediación, que van arrancar el llunes viniente nel uvieín IES Alfonso II con convocatoria personalizada según apellíu les tardes hasta’l día 19.

P’algamar el certificáu ye necesario sacar, polo menos, una puntuación de 5 en caúna de les cinco partes partes y una media de 6 ente toes. Hasta’l momentu son más de 1.000 les persones que se matricularon a les pruebes de certificación B2 o C1 de Llingua Asturiana.

Na semeya, preparativos pa una de les pruebes celebraes el sábadu na Escuela Oficial d'Idiomes d'Uviéu.