Les llingües propies sonlo “caúna nel so ámbitu territorial”, especifica IX na so propuesta d'artículu 4

“Foro yá tien l'escenariu económicu y agora, mientres decide, hai qu'avanzar nun testu de consensu”, apunta Ángela Vallina. IX presentó una propuesta d'artículu 4 a partir del apurríu pola FSA nel qu’especifica que les llingües propies sonlo “caúna nel so ámbitu territorial” y que la llei posterior ha fixar la llende ente elles.

La vocera d’IX nun pierde de vista'l cronograma necesariu pa cumplir colos plazos pa que la reforma s’apruebe nesta llexislatura, col 1 de febreru a la vuelta de la esquina. “Los tiempos son bien importantes más allá de la responsabilidá que caún pueda tener en llegar a una situación in extremis”, señala al tiempu qu’entaína pola convocatoria d’una xunta negociación nueva, que va celebrase finalmente al entamu de la selmana qu’entra.

Mientres Foro decide’l so sofitu al procesu, conociendo yá la postura d’IX, Vallina considera qu’hai qu’avanzar nun “testu de consensu”, polo que presentó la so propuesta de redaición del artículu 4. Ésta, fecha enantes de dase a conocer la realizada por Miguel Ángel Presno, caderalgu de Derechu Constitucional de la Universidá d’Uviéu, básase na presentada pola FSA a partir de la demanda de tolos grupos participantes na negociación, especificando que “les llingües propies d’Asturies son, cáuna nel so ámbitu territorial, l’asturianu y l’eonaviego” y que la Llei de Normalización que desendoque la oficialidá “ha fixar la llinia de delimitación xeográfica ente asturianu y eonaviego”.

La propuesta d'artículu 4 de la coalición ye la siguiente:

• Les lllingües propies d'Asturies son, cáuna nel so ámbitu territorial, l'asturianu y l'eonaviego.
• L'asturianu, l'eonaviego y el castellanu son llingües oficiales d'Asturies. Una llei de la Xunta Xeneral aprobada por mayoría de 3/5 del númberu llegal de miembros, ha afitar los términos y ámbitos del usu oficial de les llingües propies d'Asturies, y ha fixar la llinia de delimitación xeográfica ente asturianu y eonaviego.
• Los poderes públicos asturianos garantizarán l'usu normal y oficial de los trés idiomes y potenciarán la utilización del asturianu y l'eonaviego en tolos aspeutos de la vida pública, cultural y informativa y, dispondrán los medios necesarios pa facilitar la so coherencia y desendolcu.
• Naide nun podrá ser discrimináu por razón de la llingua qu'emplegue.