Les fogueres tornen per San Xuan

Llueu de dos años d’un San Xuan diferente por mor de la pandemia de COVID-19, la xente torna a salir de les cases pa celebrar esta nueche máxica. Con permisu del tiempu, qu’amenaza agua en dellos puntos del país, van amburar les fogueres esta medianueche, mentes que les fontes yá tán engalanaes o van enramase a lo llargo del día.

La mayoría de ciudaes y pueblos d'Asturies –al igual que munchos barrios– tienen preparaes pa esta nueche fogueres pa celebrar el solsticiu de branu –realmente foi nel pasu del día 20 al 21, pero la Ilesia católica treslladó esta celebración pagana pa coincidir con San Xuan Bautista– y quemar los augurios malos. Esta tradición de raigaños celtes que recibía’l nome d’Alban Heruin y na que se fai cultu al sol y al agua, ta entovía mui viva nel país.

Amás ye l’únicu momentu d’atopar la flor d’agua, que surde per un instante colos primeros rayos de sol de la mañana según la lleenda, trayendo amor, belleza y salú al que da con ella. Tamién ye la nueche na que les xanes salen de les sos cueves, siendo posible veles nes fontes.

Una celebración que recupera la normalidá depués de dos años con restricciones pola situación sanitaria. Güei l’únicu enemigu va ser l’agua, que va cayer sobre manera pela tarde, cola esperanza de que dea una tregua pela nueche.

Dixebra, fiel a Tresona

La ‘Foguera d’Asturies’, como se fai llamar esta Fiesta d’Interés Turísticu Autonómicu, amiesta nesta ocasión a Dixebra, banda fixa na celebaración sacante un tiempu nel que s’apostó dende’l Conceyu de Covera pola música lletrónica, con una orquesta, Dominó. Enantes de la quema, a les 22.30 hores, va dar un conciertu un clásicu de la canción asturiana como Vicente Díaz, encargándose Nun Tris de la ceremonia previa al prendíu d’una estructura en forma de pirámide nel que rescampla un cuélebre y gran trisquel.

La foguera más multitudinaria de les que s’entamen n’Asturies ye la del Conceyu de Xixón na sablera d’El Natahoyo, qu’un añu más pierde’l so conciertu folk tres la quema a la medianueche. Caltiénse l’enramáu de fontes y actuaciones de grupos folclóricos a les 20 hores y 20.30 hores, dependiendo’l llugar, y el pasucais de bandes de gaites, Villa de Xixón y Noega, a Pando.

A la medianueche, tres el prendíu de la foguera, va tener llugar la danza prima y el llanzamientu de fueos artificiales. Otros barrios de la ciudá, como La Camocha, Cimavilla o Xove, tamién celebren esta nueche máxica nun ambiente más vecinal, mientres qu’en Mareo toca la conocida orquesta gallega Panorama.

Mieres, mentes, celebra les sos fiestes de San Xuan, onde va tocar M-Clan, y Uviéu tresllada la foguera a la plaza de Santu Domingu y El Campillín, con actuaciones de Los Pamplinas y, llueu de la quema, de Bras Rodrigo col so ‘Imperiu celta’. En L'Entregu, el Centru Social Autoxetionáu La Semiente organiza la foguera del pueblu nel prau xunto al campu de fútbol Nuevo Nalón.

Nel restu del país entámense tamién numberoses fogueres, con diferentes programaciones onde’l folk queda arrequexáu p’apostar por orquestes y música enllatada.

Especiales ‘A la gueta los suaños’

Coincidiendo con esta xornada, ponemos a disposición de los nuesos llectores el reportaxe sobre San Xuan pa neños y neñes de la nuesa seición infantil ‘A la gueta los suaños’ con refranes sobre esta fecha máxica. Ésti ayudará a los más pequeños de la casa a comprender meyor les razones d'esta celebración tan prestosa.

Tamién van poder disfrutar del cuentu animáu 'L'encantamientu' que se desendolca en San Xuan.