L'ensayu 'Nunca vencida' de David Guardado yá ta a la venta nes llibreríes

Entamó la distribución del llibru, que nel Día de les Lletres Asturianes va tar disponible en Xixón, Uviéu, Avilés, Mieres y Siero.

L'ensayu 'Nunca vencida. Una historia de la idea d'Asturies' de David Guardado, editáu por La Fabriquina, yá salió a la venta. Nél l'académicu nuevu, que va ser recibíu mañana nel actu institucional de l'Academia de la Llingua Asturiana nel Teatru Campoamor (19 hores), repasa “les idees, mitos y discursos sobre Asturies qu’a lo llargo de la historia, dende la Edá Media hasta güei, compitieron por ser dominantes, amosando’l calter ideolóxicu y l'axenda política a la que sirven”.

Un trabayu d'años del autor que yá se pue mercar en cinco conceyos depués de que güei arrancase la distribución. De momento ta disponible en Xixón (Paradiso, La Buena Letra, La Revoltosa, Toma 3, Roy, Central, Corocotta, Amez y 4 Letras), Uviéu (Trabe, Pintar-pintar y Cervantes), Avilés (Clarín, Cosas en Familia y Avilés ¡Qué guapina yes!), Mieres (La Llocura y La Pilarica) y Siero (Fnac).

Mañana, Día de les Lletres Asturianes, 'Nunca vencida', al igual que'l restu de llibros y discos n'asturianu y gallego-asturiano, va contar con un 10 por cientu en toes estes llibreríes. Amás, los veceros van recibir de baldre cola merca un exemplar de la obra conmemorativa de la XLIV Selmana de les Lletres Asturianes, 'Xosé Bolado. Fálame duce' (nel occidente distribúise'l cómic 'Gladius' del humorista gráficu Ernesto García del Castillo ‘Neto’, que tamién va tar disponible en Trabe y Cervantes).