David Guardado presenta 'Nunca vencida' en Xixón el 25 de mayu

L'autor va tar acompañáu pola prologuista, Pilar Sánchez Vicente, y por Cristóbal Ruitiña.

Nuna fecha tan señalada como'l 25 de mayu, aniversariu de la declaración de soberanía de la Xunta Xeneral, va tener llugar la presentación de 'Nunca vencida. Una historia de la idea d'Asturies' (La Fabriquina). David Guardado fai nesti trabayu un repasu detalláu de “les idees, mitos y discursos sobre Asturies qu’a lo llargo de la historia, dende la Edá Media hasta güei, compitieron por ser dominantes, amosando’l calter ideolóxicu y l'axenda política a la que sirven”.

L'actu va tener llugar en Xixón, na Casa Natal de Xovellanos a les 19 hores, cola presencia de Sánchez Vicente y Ruitiña. Nun va ser l'únicu eventu nel que'l xixonés va dar a conocer el so trabayu, yá que'l miércoles 7 de xunu, a les 19.30 hores, va acudir a Uviéu, al Club de Prensa Asturiana de 'La Nueva España', nuna mesa xunto col propiu periodista, l'historiador Javier Fernández Conde y l'ex presidente Pedro de Silva.