L'Audiencia condena a 8 años de cárcel a Grueso pol 'casu Niemeyer'

|
Centru Niemeyer

El tribunal ve delitos de malversación de caudales públicos y falsedá de cuentes, y absuélvelu del d'insolvencia punible. Reciben tamién penes José María Vigil del Río y José Luis Rebollo, mentes qu'evita la prisión Judit Pereiro, muyer de Natalio Grueso, acusada de cómpliz.

La 'Audiencia Provincial' condenó esta mañana a Natalio Grueso a 8 años de cárcel dientro del 'casu Niemeyer', una sentencia que nun ye firme al poder ser recurrida al Tribunal Supremu. La Fiscalía pidía 11 años de manera inicial.

Grueso foi direutor de la Fundación Oscar Niemeyer dende'l 2006, entidá constituyida pa xestionar l’equipamientu cultural d’aquella entovía sobre planu, pa depués ocupar la direición del Centru Niemeyer hasta'l 2011, cuando’l presidente d’Asturies, Francisco Álvarez-Cascos, decidió retirar la cesión del mesmu a la Fundación nel so afán de finar colos ‘chiringuitos’ socialistes. Tres l’adelantu de les eleiciones y la victoria de Javier Fernández, la conseyera y agora alcaldesa de Xixón, Ana González, denunció n'avientu del 2012 la xestión del centru tres garrar la direición del mesmu y detectar irregularidaes na etapa de Grueso.

Otres penes

L'axente de viaxes José María Vigil del Río deberá permanecer presu 7 años y 6 meses, y l’ex secretariu de la Fundación, José Luis Rebollo, 2 años. Queden absueltos la ex muyer de Grueso, Judit Pereiro, y l’ex xefe de producción del Niemeyer, Marc Martí, que perdiera la condición d'acusáu nel procesu.

Semeya propiedá del Centru Niemeyer.

Contador Estadistiques