Comienza'l xuiciu pol 'casu Niemeyer' cola declaración de Grueso

|
Centru Niemeyer

L'ex direutor del centru avilesín aseguró que nun entraba al detalle de la contabilidá, interesándose sólo nes factures grandes.

L'Audiencia acueye dende esta mañana'l xuiciu del 'casu Niemeyer', que tien como principal acusáu a Natalio Grueso. En llibertá dende'l 24 d'ochobre tres pagar una fianza de 40.000 euros y entregar el pasaporte depués de tar un mes en prisión de manera preventiva tres ser declaráu en busca y captura, la Fiscalía pidi-y once años d cárcel: 6 por una delitu de malversación de caudales públicos, 3 por falsedá de cuentes y 2 por insolvencia punible.

Na primer de les catorce sesiones previstes declaró'l propiu Grueso, qu'apuntó que toles sos actuaciones teníen el conocimientu del Patronatu de la Fundación Nieyemer, presidíu naquellos primeros años pola conseyera Ana Rosa Migoya, y del presidente del país, Vicente Álvarez Areces. Negó que se fixeran gastos irregulares y apuntó qu'él namái se centró na xestión cultural, ensin entrar nel detalle de la contabilidá, controlando namái los grandes gastos.

Na so declaración tamién defendió a la so esposa, Judith Pereiro, que s'enfrenta a 2 años y 3 meses por malversación, afirmando qu'ella namái trabayó como collaboradora, dalgo que, apuntó, conocía tol mundu. Güei taba prevista que participara tamién nel xuiciu, pero finalmente va facelo mañana tres allargase la sesión d'esta mañana una vegada que finalicen les entruges a Grueso.

Contador Estadistiques