L'asturianu y el gallego-asturiano van llegar a les escueles d'idiomes, pero con certificación propia

Lydia Espina pon fecha al entamu de les clases y avanza cómo ta la planificación de la iniciativa.

"Vamos introducir la enseñanza d'asturianu y del eonaviego nes escueles oficiales d'idiomes a partir del cursu 25-26", anunció la conseyera d'Educación esta tarde en comisión a una entruga de Cova Tomé, diputada eleuta de Podemos, "sobre los motivos polos que se refuga la impartición del cursu d'asturiano nel Centro d'Educación de Persones Adultes d'El Nalón". Sicasí, puntalizó, "vamos emitir una certificación propia al nun ser una llingua cooficial".

"Podrán obtener la mesma certificación, poro, qu'ofrecemos al traviés de les pruebes llibres que llevamos organizando dende'l cursu 2020, pero recibiendo la formación necesaria pa consiguilo", apuntó darréu pa finar afirmando que "creo sinceramente y de corazón qu'esti ye un pasu mui importante na enseñanza de la llingua". Pero lo cierto ye que, como pasa con les pruebes de certificación de Llingua Asturiana adaptaes al Marcu Común Européu de Referencia pa les Llingües, nun va tener la mesma validez que les del restu de llingües del Estáu, inglés, francés, alemán, italianu o otros idiomes que se pueden impartir nes diferentes escueles oficiales d'idiomes.

La conseyera avanzó que la Direición Xeneral d'Ordenación Académica "yá ta planificando tol desarrollu curricular que conlleva pa qu'a partir del cursu 25-26 podamos empezar toles persones que queramos formanos na llingua a estudiala en toles academies d'idiomes d'una manera totalmente reglada, al mesmu nivel que se recibe n'inglés, francés, alemán o italianu".

Posibilidá sólo del A1 y del A2 nel CEPA del Nalón

Esta comunicación diola Espina depués d'afirmar que la so conseyería indicó al CEPA del Nalón que "pueden impartir asturianu nos niveles A1 y A2", y que l'intermediu y l'avanzáu, en concretu'l B2 y C1, que foron los que solicitó poner el centru, "tienen que dase n'escueles oficiales d'idiomes, como recueye la norma". Dende'l CEPA del Nalón, como denunció CC OO Enseñanza, aseguraron a lo último de febreru a Asturies.com que nun tuvieron respuesta d'Educación al pidimientu fechu al entamu del cursu.

Na semeya, Espina intervién nun momentu de la Comisión d'Educación.