Educación nun atiende la demanda de los alumnos del CEPA del Nalón pa preparar el B2 y C1 d’asturianu

Silenciu de la conseyería énte’l pidimientu fechu pol centru pa poner 2 hores selmanales de Llingua Asturiana ensin un aumentu del costu de personal. Ésta ye la valoración que fai la direición d’una situación denunciada por CC OO.

“Fixímoslo porque los alumnos nos lo pidíen. La xente entrugábanos sobre la posibilidá de que punxéramos un cursín de preparación pa los esámenes de certificación d’asturianu”, espliquen en referencia a les pruebes B2 y C1 de Llingua Asturiana adaptaes al Marcu Común Européu de Referencia pa les Llingües. D’esta forma entamóse dendel’l Centru d’Educación de Persones Adultes (CEPA) del Nalón una campaña de captación, qu’abarcó tamién les redes sociales, “pa conocer cuántos querríen apuntase”, y de la que salieron preinscrites “unes 30 persones, lo que daba pa poner un cursu”.

“La demanda social yera elevada y el profesor d’asturianu que da clase nel centru taba mui motiváu”, lo que se treslladó nun escritu a la Conseyería d’Educación na que tamién s’especificaba que la disponibilidá horaria del maestru permitía que’l cursu se desenvolviera ensin aumentu de costu de personal nengún. Esto foi en setiembre y hasta’l momentu’l CEPA del Nalón recibió como única respuesta un silenciu que traducen en que “nun tán pol llabor”, lo que sorprende sobre manera pol fechu de que “se supón que ye un Gobiernu qu’apuesta pol asturianu”.

Esti cursu yá nun daría tiempu a entamar coles clases prepatives del B2 y C1, pero la intención de la direición ye la de siguir insistiendo pal viniente. “Nun lo entendemos”, insisten sobre la situación.

El sindicatu fala de “vetu”

El Sindicatu d’Enseñanza de Comisiones Obreres (CC OO) Asturies refiérse a la mesma como un “vetu de la Conseyería d’Educación a la preparación de les certificaciones de niveles de Llingua Asturiana nos Centros de Persones Adultes”. Énte’l retrasu na respuesta, dirixóse a l’Almnistración pa esixir una “per escritu al centru esclariando si podía o non empezar a impartir estes enseñances”, tamién ensin respuesta, “polo qu'atopámonos de facto énte una denegación de l'autorización por silenciu alministrativu”.

Poro, denuncia “públicamente esta denegación tapada” y pregúntase “cómo ye posible qu'un gobiernu de coalición que se diz defensor de la llingua y la cultura asturiana torpedie les enseñances p'adultos de la llingua que diz defender”. Al empar, esixe “que s'autorice, con calter urxente, la impartición de les enseñances preparatories de les pruebes de nivel”.