L'Assemblea di Corsica torna a tener mayoría nacionalista

Gilles Simeoni gana les eleciones col 40,64 por cientu de los votos na segunda vuelta. Francia celebró'l domingu eleiciones territoriales.

El nacionalismu corsu torna a tener mayoría na Assemblea di Corsica. El partíu Femu a Corsica del políticu de Bastìa ganó tamién la segunda vuelta aumentando los sos apoyos del 29,19 por cientu al 40,64.

En total suma 32 escaños de los 63 del parllamentu corsu, polos 17 de los republicanos franceses, en coalición cola Union des Démocrates et Indépendants y la formación de la islla Comité Central Bonapartiste, qu'algamaron un 32,02 por cientu. Simeoni suma 14 escaños más, mentes que la candidatura de Laurent Marcangeli aumenta la so representación en 1.

El Partitu di a Nazione Corsa (PNC) de Jean-Christophe Angelini foi en solitariu nesta ocasión depués d'acudir con Gilles Simeoni na anterior, al igual que Corsica Libera (CL). Llueu de dir per separtao na primer vuelta, el PNC y CL axuntaron llistes pa la segunda, consiguiendo, con un apoyu del 15,07 por cientu, un total de 8 sielles. Supón una perda de 15 en comparanza a los que teníen hasta agora les dos formaciones.

Completa l'arcu parllamentariu los independentistes Rinnovu, lideraos por Paul-Félix Benedetti, con un 12,26 por cientu y 6 escaños. D'esta forma, los nacionalistes corsos sumen 46 de los 63 asientos de l'Assemblea di Corsica.

Ye pa rescamplar l'alta participación en Corsica, del 58,91 por cientu, en comparanza col restu de territorios, con astenciones d'ente'l 60 y el 70 por cientu.

EH Bai, segunda fuercia n'Iparralde

Nes eleiciones de Nouvelle-Aquitaine, ganaes pol socialista Alain Rousset, al frente de la coalición del Parti Socialiste, el Parti Radical de Gauche, el Parti Communiste Français y Place Publique, EH Bai convirtióse na segunda fuercia d'Iparralde per detrás de la centroderecha francesa. Los nacionalistes vascos algamaron el trunfu n'Hendaia con un 52 por cientu de los votos, lo que-y permite contar con 2 representantes nel conseyu del departamentu de Pyrénées-Atlantiques.

Otra manera, en Breizh ganó la coalición liderada por Loïg Chesnais-Girard formada pol Parti Socialiste, el Parti Communiste Français, el Parti Radical de Gauche, Mouvement Radical, Cap Écologie, Breizh War Raok! y AE, al que se sumó na segunda vuelta l'ecoloxista Daniel Cueff, con un 29,84 por cientu de los votos y 40 escaños. Los republicanos, con 21,98 por cientu, sumaron 14, y Los Verdes, que diben con Unvaniezh Demokratel Breizh, ente otros partíos, 12 con un 20,22 por cientu del total de votos.

Na semeya, Simeoni nel actu de pieslle de campaña en Bastìa.