Córcega va algamar l'autonomía dientro de la República Francesa

Éstos son los principales puntos del alcuerdu ente'l Gobiernu y representantes políticos corsos, pendiente d'aprobación pola Assemblea.

El ministru del Interior y Territorios d'Ultramar, Gérald Darmanin, anunció anueche "un ampliu alcuerdu institucional conforme a les esixencies d'Emmanuel Macron", presidente de la República. Ésti consiste en dotar a Córcega d'un estatutu d'autonomía "que tenga en cuenta los sos intereses venceyaos al so calter insular mediterraneu, históricu, llingüísticu y cultural".

Nel mes de setiembre Macron yá anunciara la so disposición de ceder énte les pretensiones de la islla y conceder una autonomía limitada depués de les movilizaciones en Córcega pola muerte na cárcel d'Yvan Colonna. Agora llega esti alcuerdu qu'ha ser ratificáu pola Assemblea di Corsica, de mayoría nacionalista.

Darréu, habría ser necesario una modificación de la Constitución francesa pa incluyir un artículu específicu sobre la islla. Nél nun se va facer referencia al pueblu corsu nin a la cooficialidá de la llingua llariega, apuntó Darmanin.

Na imaxe, Bastìa. Semeya propiedá de l'Assemblea di Corsica.